'Cabacas auzia'. Epaiaren ondorena

Beltran de Heredia sailburuak dio jada «autokritika» egin duela Ertzaintzak

Segurtasun arduradunak esan du Cabacasen heriotza «mugarria» izan zela eta «protokoloak» aldatu dituztela:«Akats konponezina izan zen»
Beltran de Heredia, atzo.
Beltran de Heredia, atzo. EFE

Edurne Begiristain -

2018ko abenduak 1
Eusko Jaurlaritzako Segurtasun sailburu Estefania Beltran de Herediak urgentziaz deitu zituen atzo komunikabideak, Iñigo Cabacasen auzian emandako epaiari buruz aritzeko. Ez zen agerraldi bat ere izan. Zutik jarrita, inguratutako medio guztiei egin zizkien adierazpenak. Onartu zuen, bere garaian Cabacasen heriotza «mugarri bat» izan zela, eta «autokritika» eginarazi ziola Ertzaintzari. «Protokoloak, materialak eta jarduteko moduak aldatu dituzte ordutik». Hala ere, aurreratu zuen gerora ere «hobekuntzak» egiten jarraituko dutela. Orduan esandakoa, eta ordutik hona behin baino gehiagotan esandakoa errepikatu zuen berriro: «Akats konponezina izan zen gau hartan gertatutakoa».

Erantzukizunak zuritu ote dituzten galdetuta, berriz, gogoeta egin dutela erantzun zuen Beltran de Herediak eta une oro «justiziarekin elkarlanean» aritu direla. «Erantzukizunak, zein eratakoak? Epai bat dago. Heriotzaren ondorioz, gogoeta eta autokritika egin zuen Ertzaintzak. Sailburu naizenetik jarduteko moduak, ikertzeko moduak eta materialak aldatu ditugu Ertzaintzan».

Epaiari buruz, berriz, hura «adi irakurtzeko tartea» behar dutela adierazi zuen sailburuak, eta aurreratu zuen aztertuko dutela familiak auzitegietan jarritako kalte ordain salaketa ere. «Itxaron behar dugu. Ertzaintzak eta Segurtasun sailak justiziarekin kolaboratzen jarraituko dute».

Beltran de Herediak Eusko Jaurlaritzaren «dolumina» agertu zion Iñigo Cabacasen familiari, bai haren «heriotzagatik» eta baita heriotza hori gertatu zen «moduarengatik».

Aro baten «amaiera latza»

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna