Autogintzara ere iristen ari da COVID-19aren bigarren olatua, eta, udaberrian egin zuten bezala, enpresa batzuetan hasi dira neurriak hartzen lan kargan eta logistikan dituzten arazoengatik. Euskal Herrian langile gehien dituzten bi lantegien kasua da hori: Gasteizko Mercedesena eta Iruñeko Volkswagenena. Aurrenekoak berretsi du behin-behineko langileak kaleratzeko asmoa duela. Hala jakinarazi du langileen batzordeak. Horren ordez, sindikatuek aldi baterako enplegurako erregulazio egiteko eskatu diote, baina, azaldu dutenez, aukera hori baztertu egin du. Hori hala, pandemiaren hasieran hartutako konpromisoak ez betetzea leporatu diote zuzendaritzari. Bere irizpideak eta erabakiak inposatzea eta «mehatxua tresna nagusi gisa» erabiltzea egotzi diote.
Alemaniako multinazionalak asteartean iragarri zituen kaleratzeak, baina ez zuen zehaztu zenbat langileri eragingo dien neurriak. Sindikatuen arabera, 500 inguru izango lirateke. Lantegiak 5.000 behargin ditu. Enpresak azaldu duenez, 2021eko lehen hiruhilekoan ekoizpen erritmoa murriztuko du, «ahal den neurrian enplegurako neurri zorrotzagoak saihesteko». Azaldu du «desoreka handia» dagoela ekoizpen gaitasunaren eta eskariaren artean, eta hori zuzentzeko, berriz, egungo hiru txandetako baten lan erritmoa murriztuko duela, datorren urtean 131.500 furgoneta egiteko helburuarekin.
Sindikatuek gogorarazi dutenez, martxoan enpresak akordio bat sinatu zuen enpresa batzordearekin, pandemiagatik aldi baterako erregulaziorako beste espediente batera joko balu aurrekoaren baldintza berberetan egingo zuela bermatzeko. «Enpresak bere konpromisoa ez betetzea erabaki du, seguruenik errentagarriagoa delako behin-behinekoen kolektiboa kalean uztea langile guztiei hamar eguneko lan erregulazioa aplikatzea baino, bete gabeko akordioak dioen bezala, soldata gordinaren % 80 konpentsatuz», salatu du.
Arazoak Landabenen
Nafarroako Volkwagenek, berriz, jakinarazi du enplegua erregulatzeko espedientea berriro aplikatzea aurreikusten duela, piezen hornikuntzan izaten ari den arazoengatik. Sindikatuetako iturrien arabera, Landabengo lantegiko zuzendaritza hilabete honetatik aurrera has daiteke egun batzuetanan txanda batzuk kentzen, baina oraindik ez du zehaztu zenbat denboraz izan daitekeen eta zenbat langileri eragingo liekeen neurriak.
Mercedesek kaleratzeei eutsiko die, aldi baterako erregulazioa baztertuta
Aldi baterakoei eragingo lieke neurriak; sindikatuen arabera, bostehun ingururi. Martxoan sinatutako akordioa ez betetzea leporatu diote
Iruzkinak
Ez dago iruzkinik
Ordenatu