KRITIKA. Antzerkia

Erantzuna, emanaldian zehar

Shakespeare Globe on Tour ikuskizuneko irudia.
Shakespeare Globe on Tour ikuskizuneko irudia. CAMPOS ANTZOKIA

Agus Perez -

2018ko ekainak 15

'Shakespeare's Globe on Tour'

Konpainia: Shakespeare's Globe. Egilea: William Shakespeare. Zuzendaria: Brendan O'Hea. Lekua: Bilboko Campos Eliseos antzokia. Eguna: Ekainak 13.

Londresko Shakespeare's Globe konpainia Euskal Herrira etortzea gertakizun eszenikotzat jo liteke. Citytik ikusita, Tamesisen beste aldean dagoen The Globe antzokian Shakespeareren obrak interpretatzen dira, egilearen garaiko egitura mantendu duen eraikinean. Baina 1599ko antzokia aspaldi desagertu zen, eta oraingoa gure garaian inauguratu zuten, jatorrizkoaren leku beretik hurbil.

Bilbora etorri den konpainia ez da isabeldar garaiko hura, jakina, baina ezin izan diogu eutsi Williamengandik teorikoki hurbil zegoen zerbait jatorrizko bertsioan ikustearen tentazioari. Gauza batek egin digu atzera, ordea: ikusle zalantzatiak erakartzeko asmoz edo, zera zekarren propagandak, gaztelaniazko testuan baino askoz letra txikiagoan: «Gauero zuk hautatu zer obra ikusi nahi duzun». Eta, tira!, osasun arloko oposaketa batzuk baino dudazkoagoa izan den hautaketa-prozesu baten ondorioz, The Merchant of Venice aukeratu omen dugu eta alboan utzi The Taming of the Shrew eta Twelfth Night.

Esan bezala, gaualdi bakoitzean aktoreak prest egon behar dira hiru obretariko bat antzezteko, eta baldintza horrek ezinbestean dakartza mugapen tekniko batzuk, are gehiago kontuan izanda obra hautatu eta zuzenean ekin diotela antzezteari. Bide horretatik, arropa politak eta koloretsuak ikusi ditugu, dudarik gabe, egokiak pertsonaia bakoitzerako, baina arrastorik ez makillaje eta ileordeen arloetan, oinarrizko karakterizazioak hiru testuetako edozein pertsonaiatarako balio behar zuelako. Eta esandako hori kanpo-karakterizazioari dagokio, zeren eta barne-karakterizazioa hutsaren hurrengoa izan da salbuespenik gabe. Izan ere, aktore berak sonbreiru bat edo kapa bat jantzita sinistu behar izan dugu Marokoko printze baten edo Antonio bihozberaren aurrean geundela, eta horrek sano zaildu du endredoko pertsonaien gorabeherak ulertzea.

Bestetik, esan beharra dago deklamazio perfektua eta ahots-proiekzio bikaina erakutsi dutela antzezle guztiek. Aktore-prestakuntza hori zen britainiar parametroetatik espero zitekeena, eta bertute horiek izan dira muntaiaren balio nagusiak, zuzenean jotako musikarekin batera, zeren eta agertoki eskematiko txiki eta aldaezinak garraiatzen erraza eta denetarako balio izan behar zuen eta argiztapen estatikoak ez diote ezertan lagundu berez existitu ere ez den dramaturgiari. Frankizia itxura handia hartu du horrek guztiak, eta amaitzeko, kontu harrigarri bat: Melbournen (Australia) Globe antzokiaren erreplika bat eraiki dute. Pentsa dezagun, orduan, Shakespeareren kontura eta gehiegi nekatu gabe zenbat konpainia dabiltzan munduan honetan!

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna