'Aquarius'-eko 141 iheslariak banatuko dituzte

Aquarius ontzia Maltan lehorreratuko da, eta han dauden 141 iheslariak bost herrialderen artean banatuko dituzte: Alemania, Portugal, Frantzia, Espainia eta Luxenburgo. Malta «logistikaz» arduratuko da. Ontzia ostiraletik «argibideen zain» zegoen Mediterraneo itsasoan, Italiak eta Maltak lehorreratzeko baimena ukatu baitzioten. Sei herrialdeen arteko akordioa ontzi horretakoak ez diren beste 100 migratzaile ingururi ere eragingo die.

Aquarius MSF eta SOS Mediterranee GKEen ontzia da. Bigarren horretako zuzendari Frederic Penardek ontzat jo du Maltan lehorreratzea, Mediterraneo erdialdera «azkar» itzuli ahalko direlako.