Atxondo, AHTaren hesia

Atxondo-Abadiño arteko tren lasterreko lanak lizitatuko dituela agindu du Madrilek. Udalak ohartarazi du proiekturik ere ez dagoela, eta desjabetzeak egin gabe daudela.
Atxondon, 2007ko martxoan, AHTaren aurka egindako manifestazioa.
Atxondon, 2007ko martxoan, AHTaren aurka egindako manifestazioa. J. RUIZ / ARP

Iñaki Petxarroman -

2014ko abenduak 18
AHTari aurre egiteko lan berezia egin du Atxondok (Bizkaia) urteotan. Udalak Espainiako Sustapen Ministerioaren eta Adifen tramitazioa etengabe oztopatu duenez —besteak beste, desjabetzeak atzeratuz— gaur egun proiekturik ere ez dago Atxondo-Abadiño tartean. Alabaina, Mariano Rajoy Espainiako Gobernuko presidenteak agindu du bihar lizitatuko dituela AHTaren zati horretako lanak. Hala balitz, tarte bakarra legoke Bizkaian lanak hasi gabe, Euskal Y-ko korapiloko Elorrio-Elorrio tartea. Aldiz, Atxondoko alkate Rosa Elizburuk (EH Bildu) garbi dauka ezinezkoa duela Adifek Atxondoko zatian lanak hastea, aurretik proiektua onartu eta desjabetzeak egin behar lituzkeelako.

Atxondok tren lasterraren aurka egindako borrokaren hastapena 2003an koka daiteke. Orduan, udalak MECSA aholkulari enpresari ikerketa bat eskatu zion proiektuak herrian egin litzakeen kalteen inguruan. Ikerketa haren arabera, ingurumen kalteak «handiak» izango ziren, besteak beste, trena etxebizitzen ondotik igaroko denez, eragin akustiko itzela sortuko duelako. Ondorioz, MECSAk ohartarazi zuen azpiegitura eginez gero Atxondok erakargarritasuna gal lezakeela, eta biztanleria galtzen hasi.

Ikerketa hura tiraderan sartu zuen EAJren udal gobernuak, baina 2007ko udal hauteskundeak EAE-ANVk irabazita, David Cobos alkatearen eskutik, indar berriturik ekin zioten azpiegituraren aurkako lan sozial eta instituzionalari. Besteak beste, 2007an herri galdeketa bat antolatu zuten. Parte hartzea %40 izan zen, eta %98k kontrako boza eman zuten.

Udala ere oztopoak jartzen hasi zitzaion tramitazioari. Rosa Elizburu alkatearen esanetan, Adifetik edo Sustapen Ministeriotik edozein agiri iritsiz gero, udala forma eta prozedura hutsak aurkitzen saiatu da. «Forma eta prozedura akats ugari egoten da agirietan, eta, ondorioz, guk dena atzera bota izan dugu».

Horren ondorioz, hiriburuetako loturak eta Bergarako lotunea kenduta, proiektua onartu gabe eta derrigorrezko desjabetzeak egin gabe dauden zati bakarretako bat da Atxondo-Abadiño. Tarteak 5,66 kilometro dauzka, eta 116 milioi euroko kostua.

Atzo, EAJko bozeramaile Aitor Estebanek egindako galdera bati erantzunez, Mariano Rajoyk iragarri zuen bihar lizitatuko duela zati hori ministroen kontseiluak. Elizburu alkatearen ustez, iragarpen hori ezingo du bete Rajoyk, behintzat Atxondoko zatiari dagokionez. «Beharbada zati horretako Abadiñoko partean egin dezakete zerbait», iragarri du.

Eredu bat, AHTaren aurka

Atxondok AHTa oztopatzeko lan berezia egin duela onartu du alkateak. Bat dator Mugitu! AHTaren aurkako mugimenduko kide Mikel Alvarez ere. «Esan daiteke Atxondok lan eredugarria egin duela AHTaren aurka».

Elizbururen ustez, beste herrietan Atxondok hartutako jarrera berari eutsi izan baliote, obrak are eta atzeratuago egongo ziren. «Atxondora 2012an etorri ziren azken aldiz teknikariak, eta bidali egin genituen ez zutelako hemen ezer egiteko baimenik. Aurrerantzean berdin jarraituko dugu», ohartarazi du alkateak.

Bestalde, gaur AHT Gelditu! Elkarlanak deituta, protesta egingo dute Bilbon Jaurlaritzaren egoitzaren aurrean, 18:45ean, aurrekontuetan tren lasterrak hartu duen pisua salatzeko.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna