Albistea entzun

HIZPIDEAK

Nork norekin

Mikel P. Ansa -

2018ko martxoak 8 - @peruarenaansa

Iazko urtarrilean aurkeztu zuen bere azken liburua Jose Elorrietak, eta titulu argia eman zion BERRIAri elkarrizketan: «Ez badago ezkerretik indar metaketa bat, ez dago prozesurik». EAJk ez zuela Maltzagaraino joateko asmorik, eta, hura gabe, ELAk eta LABek, subiranismo sozialaren bidetik, burujabetzarako prozesu bat elkarrekin abiatu behar zutela defenditzen zuen. ELAk eta LABek, urtean zehar, eta beren kongresuetan, zimenduak jarri zituzten aliantza hori gauzatzeko. Ekainean, Eusko Legebiltzarrean, «alde bakarreko burujabetza prozesu bat» abiatzeko eskatu zuten bi sindikatuek. Hego Euskal Herrian ez, baina Katalunian hasi zen alde bakarreko prozesu hori, eta emaitza begien bistan dago azkeneko asteotan. ELAren eta LABen arteko aliantza, berriz, zintzilik dago. Azken hilabeteetako ekintza batasuna hausteko zorian gelditu da, LABek Eusko Jaurlaritzarekin hezkuntzan izenpetutako akordioen ondoren. Ekaitza dago bi sindikatuen artean, Adolfo Muñoz ELAko idazkari nagusiak egunotan argitaratutako gutunean lerro artean irakurtzen denez. EAJrekin Maltzagairano joateko aukerak aztertu nahi ditu, bitartean, EH Bilduk —hori ondoriozta liteke Eusko Legebiltzarreko autogobernu lantaldean egin duen diskurtsotik—. Euskal Herriaren subiranotasunaren aldeko indarren artean diagnostikotik bertatik hasten dira diferentziak; nork norekin zer egin behar duen ere ez dute berdin ikusten. Eta nondik hasi ere jakin ezean, nekez helduko dira urrutira.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.