Birikak arnasberritu

Herri euskaldunetako beherakada gelditzen hasi da, Eustatek Araba, Bizkai eta Gipuzkoan egindako inkestaren arabera. Azken inkestan (2011n), %72 ziren euskaldunak eta orain, %75. Euskararen birikak arnasberritzen hasi ote diren geroak esango du, mehatxuak ez baitira gutxi.

Izan ere, gero eta erdaldun gehiago daude herri horietan. Nondik heldu diren? Kanpotik, sarri askotan. Herri txikietan hirigintzaren eragina ez da nolanahikoa, hizkuntza ohiturak baldintzatzeraino. Ezagunak dira kasuak herri txiki askotan. Besteak beste, horregatik jaso zuen Jaurlaritzaren Udal Legeak hirigintza proiektuen eragin linguistikoa ebaluatu beharra. Ondoren, Lurraldea Antolatzeko Gidalerroak onartzerakoan, baina, erori egin zen betebehar hori, nahiz eta Hizkuntza Politikarako Sailburuordetzak ebaluazio horren aldeko iritzirik azaldu izan duen. Eraikuntzaren lobby-ei euskararen birikek zer arnasa duten askorik ez axola izatea gauza bat da. Beste bat da Jaurlaritzaren ardura. Eta, horri dagokionez, zerbait egitea komeni da, birikak benetan osatu eta sendotuko direla bermatzeko.