IRLEN SAREA

Piztu da

Gorka Julio -

2017ko urriak 21
Sarean elkarrizketa asko ematen dira egunero, pertsona zehatzengan sortzen dute interesa, baina badira batzuk zerbait pizten dutenak eta hedatzeko ezinbesteko direnak. Izaro Basurkoren Google hezkuntzan artikulua horietako bat da.

Artikuluan jasotzen du Hackinbadakigu eta Librezale taldeetan izandako zenbait elkarrizketen sintesia eta hausnarketa zabala. Kezka nagusia: Google hartzen ari den indarra gure hezkuntza sisteman.

Chromebook-ak aipatzen ditu, Googlek bere produktuak bakarrik erabiltzera bideratutako ordenagailu merkeen txertaketa; Gmail eta Google kontuak izatearen derrigortasuna; Googleren tresnen orokortzea eskola proiektu berezituen bidez eta baita horiek hedatzeko ekitaldi eta formazio saioak.

Aspalditik jendartearen sektore batzuetan zegoen kezkari ahotsa eman dio Izarok. Askotan agertu da gaia, adibidez, Informatikari Euskaldunen Bilkuretan. Beste esparru askotan ere, orokorrean hezkuntza eta teknologia ukitzen den momentuan norbaitek beti aitatzen du.

Aztertzeko moduko gaia da, bakoitzak daukan ibilbidetik eta perspektibatik. Proposamen bateratuak egiteko aukera ere egin liteke, hezkuntzari lotutako agenteak batuz gero. Izarok horixe ere azpimarratu du.

Bada zerbait egiteko garaia? Nola eragin! Hori da sortzen ari den kezka orain, baina oraingoan badirudi pausoak emateko prest dagoen jendea dagoela. Ikasle, irakasle, guraso, formazioarekin harreman ez zuzena duen jendea baina arduraz bizi duena... profil askotariko jendea gaiarekin lotu da. Telegram kanal bat ere sortu dute: t.me/hezkuntzanlibre. Ordu batzuetan 50 erabiltzaile baino gehiago ditu.

Alternatiba hitza aipatzen da, beste herrialde batzuetakoak izan edo gure ingurunean ere praktika ezberdinak izan daitezke. Baina alternatibarik bada, software eta ezagutza librearen inguruan eraiki behar dela argi dagoela dirudi. Horretan, behintzat, lehen urratsean bada ere, adostasun zabala dago. Nola ez?

Proposamenen garaia ireki daiteke orain, indarra badago; baliabideen garaia irekitzeko ondoren edo irekitzearekin batera auto-eraketaren bidea hartzen bada. Edozein dela bidea, martxan jartzeko ordua iritsi dela sentitzen dute askok. Piztu da zerbait, hori da garrantzitsuena.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna