EKOGRAFIAK

Ikuskizuna (II)

Jokin Labaien -

2018ko martxoak 15
Joan den astea nola, hala igaro dira igande iluntzea, astelehena eta asteartea. Ikuskizunaren gurpilak aurrera jarraitu du, ohi baino begi gehiago begira eta aho gehiago zalantza adierazten izan arren. Aipatu nituen hemen, asteartean, niri Gabriel Cruzen desagertzeak eta hilketak zein Ana Julia Quezadaren atxiloketak, bereziki, telebistan izandako lanketak eta oihartzunak eragindako izua eta deserosotasuna.

Ulertzen dut telebistako albistegi eta saio desberdinetako kideek gaiari heldu, jarraipena eman eta sortu den —duten— oihartzunari erantzun behar diotela. Badakit hari bakarrak mutur asko izan ditzakeela. Ordea, helburua eta modua iruditzen zaizkit zalantzagarriak. Helburua aldameneko kateak, saioak edo albistegiak adina —edo gehiago— ikus-entzule izatea soilik baldin bada, logikoa iruditzen zait ikuskizunaren gurpilean sartu eta abiada geldiezinean sentitzea. Telebista kate publiko edo pribatu izan, hedabidearen lanari ardura eta eginkizun sozial batetik begiratuz gero, hamaika aukera daude, dena den. Horrek hari mutur batzuk albora utzi eta beste batzuei heltzea ekarriko du, eta baita hari mutur batzuei beste ikuspegi batetik begiratzea ere. Alegia, iruditzen zaidala gertatuarekin lanketa handia egin daitekeela, minutu asko inberti daitezkeela bestelako helburuei begira. Landu liteke gertakaria bera, hala dagokien erakunde eta iturriek ematen duten informazioa zabaldu eta haien jardunari jarraipena eginez. Landu liteke gaurko gizartean indarkeriak edo biolentziak duten funtzioa edo erabilera, haren jatorrira, oinarrira eta funtsera gerturatuz; edo, horrelako kasuetan, zenbateraino diren haurrak zaurgarri. Landu liteke ondorioen gaia, ez zigorrena, ez zigor mota bakarrarena; betiere, helburua halakorik berriro ez gertatzeko pausoak ematea eta halakorik egin duenak ondorioak jaso eta beste bide bat hartzea ahalbidetzea baldin bada. Landu liteke arduradun politikoek, erakundeek, hedabideek, sare sozialetako erabiltzaileek eta herritarrek gai hauetan dugun rola eta funtzioa; zenbateraino bultzatzen ditugun joera batzuk, zenbateraino helburua lagundu edo trabatu.

Lanketa horiek abiapuntu eta helburu jarriz gero, horretarako baliabideak eta pertsona egokiak jarriz, apalduko litzateke ikuskizuna, eta nagusitu bestelako zerbait.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna