EKOGRAFIAK

Entretenimendua

Miren Manias -

2018ko apirilak 25
Euskal Herrira egindako azken bisitan, aukera izan dut ETBko bi ekoizlerekin entretenimenduaz hitz egiteko. Gogoeta egin genuen genero horretako telebista saioak egiteko prozesuaz, (berezko) zailtasunez eta ikusleen erantzunaz. Alderatu genituen 1980ko eta 1990eko hamarkadetan egindako entretenimenduzko programak eta egun ETB1en daudenak. Eta, antzekotasunak baino gehiago, aldeak nabarmendu genituen. Bereziki, finantzaketa, produkzio eta distribuzio ereduetan. Neurri handi batean, krisi ekonomikoak eta ikus-entzunezko sektoreak bizi duen etengabeko aldaketa egoerak nabarmen aldatu baitute telebista egiteko modua. Eskarmentu handiko emakumezkoen arteko solasaldi atsegina izan zen eta, zorionez, iritzi ezberdinak trukatu genituen.

Zaila da asmatzea. Alegia, audientziari interesatuko zaion eta dagoeneko landua ez dagoen eduki zein telebista formatu berria sortzea. Are zailagoa da entretenimenduzko saioak adin tarte ezberdinetako ikusleak harrapatu behar baditu aldi berean. Are zailagoa da hizkuntza minorizatuan lan egiten duten telebistentzat, non berez diren txikiagoak kate horietara bideratzen diren baliabide ekonomikoak, teknikoak eta artistikoak. Jada nahiko agerikoa da hori ETB1eko eta ETB2ko produkzioetan. Horrez gain, ikuslearen fideltasuna aipatu behar da; beharbada, telebista tradizionalaren eta ez hain tradizionalaren erronka nagusietako bat. Nola bermatu hori? Ikus-entzunezko edukien Interneteko banatzaile handienek ere zaila dute horretan asmatzen.

Ez genioke saiakuntzak egiteari utzi behar, hortik baitatoz irakaspenak. Eta ez gaitezen urrutira joan besteek guk baino hobeto zer egiten duten ikusteko. Geratu gaitezen etxean. Kanaldude eta Blai gazte telebistan, adibidez. Bien artean ekoiztutako saio berriaren atal bat ikusi dut. Gustuz zein mimoz egindakoa da Anakrusa musika saioa. Aurkezlerik gabeko 30 minutuko produkzio txikia da: gaztetxe bat, kamera bi, soinu teknikaria eta mahai gaineko testu-galderak protagonistentzat. Bigarren saioan, Eneritz Furyak eta Julen Idigoras gonbidatu dituzte managerren ogibideari buruz solastatzeko. Ez dakit zuei, baina niri entretenigarria eta aberasgarria iruditu zait euskaraz musika egiten duten bi gazteren egoera gertutik ezagutzeko aukera.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna