Martxoaren 11tik 14ra egingo dute dFeria, boterea ardatz duela

Boterea izango du gai nagusi Donostiako dFeria arte eszenikoen azokak. Kontzeptuaren adiera jakin bati begiratuko dio zehazki: «Nagusitasun hegemonikoa izateko edo aginte gorena islatzeko gaitasunari». Izan ere, ideia hori islatzen dute bertan erakutsiko dituzten hainbat obrak, antolatzaileek jakinarazi dutenez. Martxoaren 11n hasiko da, eta, 14ra bitarte, askotariko antzezlanak eta dantza emanaldiak izango dira ikusgai. 25 urte beteko ditu azokak, eta, urteurrenaren harira, aurreko astebururako ere programatu dute emanaldirik.

Atariko gisa, martxoaren 9an, Los cuernos de Don Friolera taularatuko du Morfeo konpainiak, Antzoki Zaharrean, eta Sharing Home dantza ikuskizuna Denis Santacanak, Gazteszenan. Hurrengo egunean, Bilboko Arriaga antzokitik Macbeth iritsiko da Viktoria Eugeniara. Ez da azokan erakutsiko duten Shakespeareren obra bakarra izango: azokaren azken egunean, martxoaren 14an, Rey Lear antzezlana eramango du Atalaya konpainiak Viktoria Eugenia antzokira, eta Romeo eta Julieta-ren zirku moldeko bertsio bat Markeliñe konpainiak Antzoki Zaharrera.

Tartean, besteak beste, El enjambre (Vaiven), Espejismo Cabaret (El Espejo Negro), Vientos que nos barrerán (Spectare) eta Dublineses (Ados) obrak emango dituzte. Dantza ikuskizunik ere izango da. Martxoaren 11n, Kukai konpainiak Erritu erakutsiko du, Viktoria Eugenian, eta, hurrengo egunean, antzoki berean, Lava konpainiak Fernando Hernando Magadanen Bending The Walls eta La Intrusaren Beyond piezak.