'Mistakes on Purpose'

Berpizte musikal baten berri ekarri digu Ethiopiques bilduma ezinbestekoaren 30. aleak. 25 urteko isiltasuna hausten duen Girma Beyene musikari etiopiar beteranoaren berpiztea da —diktadura garaian herrialdea utzi eta AEBetan egin zuen bolada luze bat—, hain zuzen ere, disko honek jasotzen duena. Akale Wube taldearen gonbidapena jaso, eta 2017ko irailean Parisen emanaldi gogoangarria eman ondoren sortu zen disko hau egiteko proposamena. Horrela sortu zen ethio-groovez betetako lan hau. Benetan aproposa talde frantziarrak kantari eta piano-jotzaile beteranoaren musikari ematen dion jantzia. Ziurrenik, taldearen lanik borobilena bere zortzi urteko ibilbidean. Entzungarria oso.