«Txertaketa kanpainak egiten ondo entrenatuta gaude munduan»

Txertoetan aditua da Del Val. Arloko ikerketak «bizkor» doazela onartu du, baina «zuhurra» da.

Txertoa lortzeko egitasmo asko daude martxan. Zure kalkuluen arabera, noiz lortuko da?

Nik ez dut kalkulurik egiten. Argi dut aurtengo udazkenerako edo negurako ez dela izango; populazio osoarentzat, behintzat, ez.

Gero diseinatu egin beharko da plan bat mundu osorako...

Bai, baina txertaketa kanpainak egiten ondo entrenatuta gaude munduan. Oraintxe lortu da, esaterako, pandemia baten erdian, Afrikan poliomielitisa desagerraraztea. Eta, adibidez, baliabide gehiago dituzten herrialdeek garestiago pagatzen dituzte umeentzako txertoak, herrialde behartsuagoek gutxiago pagatzeko. Sistema hori ondo olioztatuta dago. Munduan dagoen sistema solidarioenetako bat da; gosearena baino gehiago. Elikagaiak izan badira, baina ez dira ondo banatzen. Txertoekin, egiten da.