Migrazio politikak. Hendaiako atxikitze zentroa

Etorkinik ez Hendaiako zentroan, behin-behinean

Hendaiako atxikitze zentrora ez dituzte ekarri etorkinak azkenean, Bizik antolatu manifestazioagatik. 146 boluntario etorkinen lekua hartzeko prest agertu dira
Hendaiara 80 boluntario hurbildu ziren, zentroan giltzapetuak izateko prest, etorkinen ordez, <em>Haiek gu gara</em> lema berenganatuz.
Hendaiara 80 boluntario hurbildu ziren, zentroan giltzapetuak izateko prest, etorkinen ordez, Haiek gu gara lema berenganatuz. ISABELLE MIQUELESTORENA

Nora Arbelbide Lete -

2018ko apirilak 4
Horra bi une gune berean irudikatuak. Unea, atzoko eguna. Batetik, Hendaiako atxikitze zentroa (Lapurdi) berriz irekitzeko eguna. Eta bestetik, Frantziako Gobernuaren Asilo eta Immigrazio lege proposamenaren azterketaren hasiera Asanbleako lege batzordean. Eta gunea, Hendaiako atxikitze zentroa bera: preseski, urruneko Paris hartan eztabaidatzen ari diren horren errealitatearen miraila. Hor agertu baitziren parez pare bi jarrera. Batean, zentroa bera gotorleku bilakatua: bertara sartzeko hiru sarrera nagusietan, poliziak lerrokaturik. «Errepresio neurriz» josia dagoen lege proiektua irudikatuz, Christine Lazerges Giza Eskubideen aldeko Frantziako Batzordeko presidenteak lege proiektuaz erran hitzak berriz hartuz. Eta parean, aldiz, elkartasunerako deia: EtorkiZUna hitz jokoarekin, etorkizuna etorkinekin baizik ikusten ez dutenena. Europa, zentroaren antzera, «presondegi» bilakatzearen aurkako deia. Atxikitze zentroaren irekitzearen aurka, baita lege berriaren aurka ere.

Artetik errateko, Hendaiako atxikitze zentroaren heste eta berriz irekitzearen arrazoia bera ere aski adierazgarria da. 2015eko atentatuez geroztik, Frantziako agintariek martxan jarri zuten larrialdi egoera dela eta, mugak berak hestea hobetsi zuten. Aire eta mugetako poliziak mugetan metatzea erabaki zuten orduan. Kontua da atxikitze zentroetan ere Aire eta Mugetako Polizia dela lanean ari. Aski ez zirela eta, mugetako lana zuten hobetsi. Orain, berriz, larrialdi egoera gelditua dela ofizialki, poliziak berriz ere atxikitze zentrora bidali dituzte.

80 boluntario prest

80 bat boluntario hurbildu ziren atzo atxikitze zentrora, eskatuz etorkinen ordez haiek izan zitezen giltzapetuak. Orotara, 146 boluntariok zuten emana izena. Haiek gu gara leloa irudikatu zuten. Baina poliziek urrun atxiki zituzten boluntarioak. Ez ziren sartu ahal izan. Baina ez ziren zentrotik kanpo geratutako bakarrak. Izan ere, normalki hamar bat etorkin ekartzekoak zituzten bertara atzo, Bordeleko atxikitze zentrotik. Hogei leku ditu Bordeleko zentroak, eta hogeiak hartuak dira. Berritu beharretan dira, eta horretarako, hamar leku behin-behinean hetsi behar. Beraz, hamar pertsona horiek Hendaiara ekartzekoak zituzten. Lapurdiko zentroak 30 leku ditu. Baina, azkenean, manifestazioaren ondorioz, ez zituzten ekarri.

«Errango nuke lehen garaipen sinbolikoa dela. Zentroaren funtzionamendua eragotzi baitugu egun batez gutxienez», poztu zen Jose Bove eurodiputatu berdea. Izan ere, Bove bera boluntarioetako bat izan zen atzo. Eta, funtsean, zentrora sartu ahal izan zen bakarra izan zen. Eurodiputatuek, diputatuek bezala, zentro hetsietara sartzeko eskubidea daukate berez. Eta haiekin batera normalki bost kazetari ere sartzen ahal dira, baimen berezirik eskatu gabe, legez. Atzokoan kazetarien presentzia ukatu zuen, ordea, zentroko zuzendaritzak. Bove izan zen, beraz, lekuko bakar. Eraikina erakutsi ziotela zehaztu zuen. Bulegoak, baita etorkinak atxikitzeko gelak ere; ala «ziegak?», horrela deitu behar ote diren, galdera pausatu zuen Bovek berak. Nahiz eta geletatik ateratzen ahal diren, zentro hetsia baita. Baita kanpoko patioa ere: burdin hesia du gainean.

Baina, mementoko hutsa. Eta hutsa geldituko dela, esperantza horrekin segitu zuen mintzatzen Bovek: «Horrek erran nahi du egunero herritar batzuk txandakatuko balira hemen zein beste atxikitze zentroetan beharbada deuseztatzen ahalko genituzkeela deliturik egin ez dutenen giltzapetzeak. Miseriari, gerlari eta batzuetan torturei ihes egitea ez baita delitua. Gure helburua atxikitze zentroak desagertzea da. Etorkina izatea ez delako delitu bat». Eurodiputatuak berretsi zuen klima aldaketaren biktimak ere badirela errefuxiatuak. Aipatu zuen baita Europako erakundeetan errekurtso baten egiteko aukerak badaudela Frantziako Estatuaren aurka. Aztertzekoa dutena: «Frantzia da legea gaizkien aplikatzen duena Europan, eta errepresio gehien eragiten duena».

Mementoko beste manifestaziorik ez da iragarririk Hendaian bertan. Greba bai, aldiz. Zentroan, etorkinak laguntzeko jurista lanetan ari diren Cimade elkartekoek greba iragarria dute gaurko. Lege proiektua gaitzesteko eta, oinarrian, atxikitze zentroak hestea galdetzeko.

Baina, paradoxikoki, greba dela eta, agian gaur bertan —ez bada atzo eta gaur arteko gauean— ekarriko dituzte Bordelekoak, Cimadeko kide Julie Aufaurek baieztatu duenez: «Gure ausentziaz baliatuko dira».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna
Nora Arbelbide Lete

Informazio osagarria