Albistea entzun

«Bi taldeen egoerak ez dauka itxura onik»

Gipuzkoa Basket, azkena, eta Bilbo Basket, azken-aurrena. Biak ari dira ixten ACB ligako sailkapena, eta bi garaipenera dute mailari eustea, bost partida falta direla. Jon Txakartegi entrenatzaileak egoera aztertu du.
Radoncic jaurtiketa egiten Miniotasen aurrean, Donostian jokatu zuten derbian, otsailean.
Radoncic jaurtiketa egiten Miniotasen aurrean, Donostian jokatu zuten derbian, otsailean. ANDONI CANELLADA / FOKU Tamaina handiagoan ikusi

Aitor Manterola -

2021eko apirilak 28

ACB liga gaur bertan bukatuko balitz, Euskal Herriko hiru taldeetatik bi Urrezko LEB ligara jaitsiko lirateke. Azkena da Acunsa Gipuzkoa Basket, eta azken-aurrena Retabet Bilbo Basket. Zazpina garaipen dituzte, eta bost partida geratzen zaizkie. Zulotik irten eta mailari eusteko goiko bi talde harrapatu beharko lituzkete, biak libratze aldera. Estudiantesek bi garaipen gehiago ditu, eta partida bat gehiago du jokatua; Fuenlabradak ere bi garaipen gehiago dauzka, partida bat gutxiago jokatuta, eta Betisek eta Obradoirok hiru garaipen gehiago dituzte, euskal herritarrek hainbeste partida jokatu eta gero. «Ez dauka itxura onik», esan du, gordin asko, Jon Txakartegi entrenatzaileak. Gipuzkoako Saskibaloi Federazioan ari da lanean orain, eta bere garaian entrenatzaile laguntzaile izan zen Donostiako taldean; baita Baskoniaren bigarren taldeko arduradun nagusi ere.

Zailtasunak zailtasun, aukera bakarra ikusten die bizkaitarrei eta gipuzkoarrei, eta eskatu ere egin die heltzeko helduleku horri: «Amaierara arte borroka egin behar dute. Horixe da hemengo taldeen ezaugarria, eta egin dezaketen gutxienekoa horixe bera da». Jarrera egokia oinarrizkoa da partidak irabazteko, baina ez da nahikoa: jokoa ere behar da. Nola arraio lor ditzakete garaipen asko 31 partidatan zazpi baino erdietsi ez dituzten bi taldeek? «Gertatu dira horrelakoak, eta saiatu egin behar dute. Badira talde batzuk zuloan egon, oso gutxi irabazita, eta azken txanpan garaipenak lortu dituztenak». Jokalarien buruan omen dago gakoa: «Partida bat irabaztea aski izaten da batzuetan sinesten hasteko, eta orduan lor daitezke garaipen gehiago».

Gipuzkoarren aurkariak ondorengoak izango dira azkeneko txanpan: etxetik kanpo, Tenerife, Manresa eta Andorra, eta etxean, Baskonia eta Unicaja; bizkaitarren arerioak, berriz, Kanaria Handia, Burgos, Fuenlabrada eta Joventut etxean [lehen hirurak orain, elkarren segidan], eta Real Madril kanpoan. Txakartegik aukera gehiago ematen dizkio Bilbo Basketi: «Etxeko partidak irabazi behar dituzte, eta horrela, goiko aurkariak harrapa ditzakete». Gipuzkoa Basketi beste zama bat ikusten dio sailkapenarenaz gain: «Aurkari zuzen guztiekin galduta dauka basket-average delakoa, eta beste taldeen mende dago ia erabat».

Bi taldeak zulo-zuloan zergatik dauden aztertzen hasita, Txakartegik bereizi egin ditu bien egoerak: «Bilbo Basketek oso zorte txarra izan du lesioekin, eta jokalari asko ez daude ohituta jaitsierako lekuetan lehiatzen. Gipuzkoa Basket hasieratik uste zen egoeran dago, baina ondo ari da borrokan, eta ACB ligan ez dago talderik hainbeste eman duenik hain gutxirekin. Pena izan da aurkari zuzenekin galtzea».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©Osasuna

Karolina Sarasua iraindu eta mehatxatu zuten gazteak identifikatu ditu Poliziak

Berria

Adin txikikoak dira guztiak, eta, beraz, Adin Txikikoen Fiskaltzaren eskuetan gelditu da jazoerari buruzko ikerketa.

Fernando Llorente, Eibarreki azterketa medikua pasatzen. ©SD EIBAR

Fernando Llorentek Eibarren jokatuko du

Julen Etxeberria

36 urteko aurrelaria talderik gabe zegoen, eta denboraldia amaitu arteko kontratua adostu du eibartarrekin. 

Rodrigo Salinas Bidasoako jokalaria, jaurtitzen, atzo. ©GORKA RUBIO / FOKU

Bidasoak lehen garaipena lortu du Europako Ligan

Berria

Irundarrek lehen zatian eginiko lanari esker irabazi diote Pfadi, Artalekun, ligaxkako bigarren jardunaldian: 32-28

Alaveseko jokalariak, partidako gol bakarra ospatzen, Mamadou Loumek sartutakoa. ©DAVID AGUILAR / EFE

Arnasaldi sakona

Eñaut Agirrebengoa

Alavesek bigarren garaipena kateatu du, Elxen aurka, Loumen gol bati esker. Jaitsieratik irten da behin-behinean

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.