Albistea entzun

UDAKO SERIEA. Mediterraneoko mugan (III). Adingabeak. Barbara Gonzalez del Rio. Save the Childreneko migrazio arduraduna

«Adingabeak dira migratzaileak baino lehen»

SAVE THE CHILDREN Tamaina handiagoan ikusi

Maite Asensio Lozano -

2019ko uztailak 25

Mediterraneoa zeharkatuta Andaluziara bakarrik heltzen diren adingabeen babesaren inguruan kezkatuta daude zenbait eragile. «Sistema huts egiten ari zaie», esan du Barbara Gonzalez del Rio Save the Childreneko migrazioen programako koordinatzaileak.

Zer egoeratan heltzen dira etorkin adingabeak?

Batzuk senideekin etortzen dira, eta beste batzuk, familiarik gabe —12 eta 17 urte artean izaten dituzte—, baina, edozein dela ere haien egoera, adingabe izateagatik babes eskubidea dute, eta osasun arreta eta hezkuntza jasotzekoa. Horrez gain, badaude babes premia bereziak dituztenak; adibidez, asiloa eskatzen duten helduekin doazenak edo salerosketaren biktima izan daitezkeenak. Ildo horretan, seniderik gabekoek arrisku gehiago izan ditzakete, erreferente gutxiago dituztelako edo ez daudelako helduarorako prestatuta. Baina ez da paternalismoan erori behar: eskubide auzi bat da.

Gainerako adingabeen tratu bera jasotzen al dute etorkinek?

Denek dute babeserako eskubidea, baina kontraesan bat dago atzerritarren legearen eta Espainiak haurren eskubideez sinatu dituen nazioarteko itunen artean. Gure ustez, adingabeak dira migratzaileak baino lehen.

Gatazka asko izaten al dira adingabeak direla egiaztatzean?

Bai, ez baitago adina zehazteko prozesu argi eta segururik. Batzuetan, irizpidea da poliziei begiz iruditzen zaiena, eta hori arriskutsua da; eta beste batzuetan, helburu medikorik gabeko proba medikoa egiten diete, eskumuturra neurtuz, baina hori ere ez da fidagarria, besteak beste, adierazle kaukasoarren arabera sortu zelako eta errakuntza tarte handia duelako. Halakoen ondorioz, nerabeak detektatu izan ditugu CIEetan. Guk uste dugu adingabetasun presuntzioa errespetatu behar dela, eta diziplina askotako profesionalek balorazio holistiko bat egin behar dutela.

Zer balorazio egin duzue zuek adingabe zentroez?

Ez dago baliabide nahikorik, ez bolumenari dagokionez, ez zerbitzuaren kalitateari dagokionez. Oraindik asko dugu egiteko arreta pertsonalizatua emateko: ume eta nerabe bakoitzak egoera familiar, ibilbide eta bizipen desberdinak ditu. Gainera, gure arreta sistema ez dago egokituta migratzaileen premietara: adibidez, langileak ez direlako eleaniztunak, edo ez dutelako berariazko trebakuntzarik nazioarteko babesean.

Etorkin adingabeak lurraldeka banatzeko eskatu dute erkidego batzuek. Nola gertatzen da egun banaketa hori?

Ez dago lekualdatze formalik: ez dago koordinaziorik erkidegoen artean. EAEko edo Kataluniako ongizate estatuak garatuago daude, eta erantzun hobea ematen diete haurren premiei; beraz, adingabeak arreta hobea edukiko duten lekuetara joaten dira, beren kabuz. Izatez, askok zentroetatik ihes egiten dute. Esaten da ez dutela babes sisteman egon nahi, baina ez da egia: euren premietara egokitu gabeko sistemari alternatiba bat bilatzen diote.

Zer gertatzen da adingabeak adindun bihurtzen direnean?

18 urte betetzen dituzten egunean babes sistematik ateratzen dituzte, edozein dela haien prozesua, prestakuntza, egoera administratiboa edo baliabideak. Emantzipazio programetan oso gutxirentzako dago lekua, eta gehienak kanpoan geratzen dira.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Esteron ibaiaren ibarreko tarte lehortu bat, Niza hiritik gertu (Okzitania), uztailaren amaieran. ©SEBASTIEN NOGIER / EFE

Europan azken bostehun urteetako lehorterik handiena espero dute

Gorka Berasategi Otamendi

Kontinentearen erdialdeko eta mendebaldeko estatuak ezohiko bero boladak eta lehorteak ari dira pairatzen, klima larrialdiagatik. Suteek berotegi gas asko isuri dute zenbait herrialdetan

Salman Rushdie idazlea, 2019ko azaroaren 11n, Berlinen. ©HAYOUNG JEON / EFE
Monusco Nazio Batuen Kongoko Errepublika Demokratikorako misioaren kontrako protestetan hildako herritar baten hileta, aurreko astean. ©STR / EFE

Odolak mendekua nahi du

Oskar Epelde Juldain

Egunotan dozenaka lagun hil dira NBEren Kongorako misioaren kontrako protestetan. Milizianoen erasoen aurrean ezer ez egitea egozten diete kasko urdinei.

FBIko bi agente Donald Trumpen Mar-a-Lago etxearen atarian (Palm Beach, Florida), joan den asteartean. ©CRISTOBAL HERRERA-ULAXKEVITX, EFE

FBIk sekretupeko dokumentuak eraman ditu Trumpen Mar-a-Lago etxetik

Gorka Berasategi Otamendi

AEBetako presidente ohia ikerketapean dago, ustez espioitza legea urratzeagatik. Floridako etxean atzeman dioten dokumentazioaren edukia defentsa arloko gaiekin lotuta dago, besteak beste.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...