Alokairu soziala eta etxeen zaharberritzea bultzatzeko legea onartu du laukoak

Errenta bermatuaren ondotik, gizarte izaerako beste lege garrantzitsu bat onartu zuen atzo Nafarroako Parlamentuak osoko bilkuran. Etxebizitzaren foru legea babestu zuten Geroa Baik, EH Bilduk, Ahal Dugu-k eta Ezkerrak. PSN, edukiarekin kritiko azaldu arren, abstenitu egin zen; UPNk eta PPk, berriz, kontra bozkatu zuten. Laukoaren eledunek nabarmendu zutenez, egitasmoak alokairu soziala merkatu eta sustatuko du. Horrekin batera, etxeak zaharberritzea bultzatuko da, bide batez krisian den eraikuntza sektorearen alde eginez. Guztira, 1.800 lanpostu sortzea espero du Nafarroako Gobernuak.

Nahiz eta gobernua babesten duten lau alderdiek aldeko botoa eman, ñabardurak azaldu ziren bakoitzaren jarreretan. Adibidez, Geroa Baiko Isabel Aranburuk adierazi zuen legearekin «zalantzarik ez» dutela. Aitzitik, EH Bilduko Asun Fernandez de Garaialderentzat, «bide luze baten lehen urratsa» baino ez da. Ahal Dugu-ko Mikel Builek ere antzera jo zuen: «Lege honekin ez da nahikoa, baina onartzea ezinbestekoa zen». Ezkerrako Jose Miguel Nuinentzat, etxebizitza eskubidea bermatzeko pauso «sendoa» da.

Bestalde, PSNko Ainhoa Unzuk adierazi zuen legeari anbizioa falta zaiola eta «eskasa» dela: «Lege honekin ez dago aldaketarik. UPNk egindakoaren eta zuek aurkeztutakoaren artean ez dago alde handirik». Hori ez ezik, legea ez zela bidezkoa ere nabarmendu zuen Unzuk, «talde batzuei bakarrik» mesede egingo dielako, eta hutsik dauden etxebizitzen arazoari konponbiderik ez diolako emango. Horren harira, Nuinek gogoratu zion auzi hori konpontzeko 2013an onartutako legeari Espainiako Gobernuak helegitea jarri ziola, eta Auzitegi Konstituzionalaren epaiaren zain daudela.

PSNk bezala, UPNk eta PPk nabarmendu zuten legea ez dela «bidezkoa». UPNko Luis Zarralukik adierazi zuen gutxi batzuei mesede egingo diela: «Nafarroako Gobernuak zorrak ordaintzen ez dituztenak sarituko ditu». Legearen alde onak aitortu arren, esan zuen ezaugarri negatiboek pisu handiagoa dutela.