Popa, surfa eta americana estilo askean

Bi talde gertukoren kideen baturatik sorturiko taldea da The Surfing Magazines. The Wave Pictures taldeko David Tattersallek (ahotsa eta gitarra) eta Franic Rozyckik (baxua) eta Slow Clubeko Charles Watsonek (hainbat instrumentu), elkartu, eta sortu zuten proiektu berria, iaz, Londresen. Dominic Brider bateria jotzaile talentuzkoa batu zitzaien. Irailean plazaratu zuten orain arteko disko bakarra, taldearen izen bera daramana. Pop melodietatik abiatuta eta garage-rocka ardatz izanik, surf-rock musikaren, americanaren, jazzaren zein pop askeenaren elementuak uztartzen dituzte. Adituen esanetan, The Wave Picturesen azken lanetan protagonismoa galdua zuten pasarte erritmikoek indarra irabazi dute The Surfing Magazinesen proposamen berrian. Donostian ariko dira, asteartean, Dabadaba aretoan.