Musika eta literatura, eskutik

Konpositorea, kantari kontratenorra, gitarrista, pianista eta musikologoa da Wim Mertens (Neerpelt, Flandria, 1953). Dozenaka lan argitaratu ditu; azkena 2016ko Cran aux oeufs da. Pianoan eta ahotsean ariko da bakarlari gisara, baina berezitasun bat izango du emanaldiak, Kirmen Uribe idazleak ere parte hartuko baitu. Uribek, errealitatea eta fikzioa nahastuz, Robert Mussche flandiar idazlearen bizitzan oinarritutako liburua argitaratu zuen 2012an. Liburuaren harira dator kontzertu berezi hau. Robert Mussche eta Karmentxu ume euskalduna batu ziren modu berberean batuko dira Uribe eta Wim Mertens. Mertensek liburuari musika jarriko dio, soinu banda gisako musika. Horrez gain, bere lanetako kantuak ere joko ditu. Uribek, berriz, liburuko pasarteak irakurriko ditu, eta argitaratu gabeko poemaren bati ere lekua egingo dio.