Urrezko aroa gogora ekarri nahian

Urte askoan diskorik atera gabe izan eta gero, Lagartija Nick Granadako taldeak (Espainia) Crimen, sabotaje y creación lana argitaratu zuen iazko azaroaren hasieran. Grabaketa horretan Antonio Arias, Eric Jimenez, Juan Codorniu eta M.A.R. Pareja musikariek hartu zuten parte. Zuzenean era lauko horrekin ari dira, alegia, Hipnosis (1991), Inercia (1992), Su (1995) eta Omega (1996) —Enrique Morenterekin batera— lanak grabatu zituzten berberekin. Taldearen urrezko aroa izan zen hura. Euskal Herrian biratxoa egiten ari dira. Ostiralean Donostiako Kutxa Kultur aretoan aritu ziren, eta, atzo, Gasteizko Helldorado aretoan. Heldu den ostiralean Bilboko Stage Live aretoan izango dira. Aurretik Anita Parker taldea ariko da: jai giroko musika, elektro swinga, jazza eta rapa uztartuz.