Albistea entzun

Egur batek erabaki du

Iker Vicentek irabazi du Mikel Larrañagaren aurkako aizkora apustua. Otsagabiarrak 47.47ko denbora egin du; azpeitiarrak, berriz, 49.40koa
Iker Vicente besoak gora, atzo, Mikel Larrañagaren aurkako apustua irabazi zuela ospatzen.
Iker Vicente besoak gora, atzo, Mikel Larrañagaren aurkako apustua irabazi zuela ospatzen. JON URBE / FOKU Tamaina handiagoan ikusi

Ainara Arratibel Gascon -

2022ko apirilak 3

Goi mailako bi kirolari aurrez aurre daudenean, detaile txikiek erabakitzen dituzte demak. Hala gertatu zen atzo Iker Vicenteren eta Mikel Larrañagaren arteko apustua. Izan ere,Vicente nagusi izan zen, eta harentzat izan ziren jokoan zeuden 7.000 euroak. Baina eusteko ahalmen handia erakutsiz ez zizkion gauzak erraz jarri Larrañagak. Bosgarren oinbikoan, ordea, adar-begi bat agertu zitzaion Larrañagari, eta jada aurretik zegoen Vicente aldea handituz joan zen. Azkenean, 1.53ko aldearekin gailendu zen. 47.47ko denbora behar izan zuen otsagabiarrak atzoko lanak egiteko; azpeitiarrak, berriz, 49.40koa.

Aizkolariek egin beharreko lana hau izan zen: sei oinbiko (72 ontzako enborrak) eta hamabi kana-erdiko ebaki behar zituzten (54 ontzakoak). Larrañagak eraman zituen oinbikoak; atzo erabilitako egurrik handienak izan ziren, 1,6 metroko perimetrokoak. Bi kana-erdiko ere hark jarri zituen —1,2 metrokoak—. Gainontzeko hamar kana-erdikoez Vicente arduratu zen.

Ikusmina sortu zuen atzoko apustuak, eta lehia hasi baino ordubete eta 45 minutu lehenago jada hasi ziren Tolosako zezen plaza betetzen zaleak. Bete egin zen plaza azkenerako, eta zaleen hauspoa jaso zuten bi aizkolariek. Kontuan izan behar da azken hiru urteetan maila nagusiko txapelketan lehen bi postuetan sailkatu diren bi aizkolariak zeudela nor baino nor gehiago. Vicente izan zen txapeldun 2019an, 2020an eta 2021ean, eta Larrañaga txapeldunorde. Aldiz, azpeitiarra nagusitu zen iazko beste txapelketa nagusian: Urrezko Kopan.

Lan zailetatik abiatu zen Vicente: oinbikoetatik; Larrañaga, berriz, kana-erdikoetatik. Teknika da Vicenteren ezaugarri nagusia, eta hala erakutsi zuen beste behin apustu guztian zehar. Halako aurkari bati irabazteko onena eman beharko zuela ere jakitun zegoen Larrañaga, eta, 10 kilo jaitsita, fin plazaratu zen, eta antzeman egin zen. Teknikoki ez ezik, hauspo aldetik ere parez pare aritu ziren hasieran. Lan erdietara 23 bat segundoko aldearekin baino ez zen ailegatu Vicente. Horra iritsi aurretik moztutako kana-erdiko horietan, bizitu egin zuen erritmoa.

Lanen bigarren zatian estrategia aldatu zuen Larrañagak. Eta, lehen zatian ez bezala, bigarrenean oinbikoekin ekin zion. Atzetik joan arren, Vicentek ez zion ihes egiten; eusten ari zitzaion. Baina bosgarren oinbikoan adar-begia agertu zen, eta hor hasi zen zapuzten demari buelta emateko itxaropena Larrañagarentzat. Hortik aurrera, kolpez kolpe errenta handituz joan zen Vicente, eta azken bi kana-erdikoetan gozatu egin zuen, jakitun baitzegoen poltsikoan zuela garaipena.

Gustura zen Vicente amaieran: «Oso pozik nago. Sasoiko ikusi dut neure burua, eta gustura nago egindako lanarekin», adierazi zuen Euskadi Irratian. Apustua irabazita noiz ikusi zuen galdetuta, hau erantzun zuen: «Halako lan luze batean zaila da kalkulatzea. Lan erdietaraino oso parekatuta egon gara, eta uneren batean arriskuan ikusi dut garaipena». Penaz zen, ordea, Larrañaga. «Ez da posible izan, eta pena da. Izan ere, gustura aritu naiz. Baina, oinbikoan adar-begia agertu ostean, ezinezkoa izan da».

Bi aizkolariek garrantzia eman zioten atzoko egunari, eta herri kirolarentzat zuen garrantzia nabarmendu zuten: «Jende asko etorri da. Hau gure mundua da, eta aurrera atera nahi dugu».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Amaitu da euskal selekzioen aldeko azken mendi martxa

«Euskal selekzioen aldeko aldarria oso apalduta dagoela ikusi dugu»

Paulo Ostolaza

Euskal selekzioen aldeko mendi martxa azken aldiz egin dute aurten. Atzo amaitu zen, Getarian (Gipuzkoa). Iturriaren iritziz, gizarte mugimenduak nahiko garai kritikoan daude orain, «baina ziklo kontua da».

Gorka Aranberri Urdaibaiko patroia, gaur, Getarian irabazitako bandera astintzen. ©Idoia Zabaleta / Foku

Bandera eta lidergoa Urdaibairentzat, Hondarribiaren hutsegite bat tarteko

Paulo Ostolaza

Bigarren ziaboga barnealdetik hartu du Ama Guadalupekoa-k, Urdaibairekin lehian zebilela. Ligan zuen sei punturen aldea galdu du. Euskotren Ligan, Orio gailendu da beste behin ere, eta ia erabakita dago liga.

Mendizorrotza kiroldegiaren kanpoaldea, eraikin osoa ikusten dela. ©jaizki fontAneda / foku

Mendizorrotza kiroldegia, epikoa eta lirikoa

Aitor Manterola Garate

Kirola eta kultura. Saskibaloia eta musika, nagusiki. Baskonia, Araski... eta Gasteizko jazzaldia. 53 urteko eraikina xarmagarri bilakatu da urteen joanean, eta sinbolo bat ere bada.

Urdaibaiko trainerua eta eskifaia atzo Hondarribian, irabazi berri zuten banderarekin. ©MAIALEN ANDRES / FOKU

Lasaitasunaren bandera

Aitor Manterola Garate

Urdaibaik Hondarribia liderraren etxean irabazi du Eusko Label ligako bigarren bandera. Getaria laugarren izan da, eta ohorezko txandan ariko da gaur, etxean

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.