Kalean da jada Munstro txikiak bildumaren laugarren alea. Ezagutzen ez duenarentzat esango dugu duela bi urte sortu zela, formula-literatura izateko ezaugarri guztiekin, eta oraingoz, sortu zituen espektatibak betetzen dituela. Halako obrak denbora-pasako literaturaren esparruan aritzen dira, haur irakurle hasiberriari irakurketa erraz entretenigarriak eskaintzeko bokazioarekin.
Sei pertsonaia finkoz osatua dago. Formula aurrezarri bati jarraitzen diote abentura guztietan, elkarrizketa eta atal askorekin, abentura autokonklusiboekin...
Abentura bakoitzean protagonistetako bat jartzen da fokuan. Oraingoan Frankitxori egokitu zaio. Urtebetetzerako herensuge txikitxo bat fabrikatu nahiko diote gurasoek, baina dena korapilatu egingo da Frankitxo eta lagunek laborategira sartu eta sorkuntzari isurki berde bat nahi gabe botatzean. Ondorioa, herensuge izugarri bat gixajokien (pertsona arruntak) hiria suntsitzeko punttuan egongo dela...
Gustagarria egiten da irakurketa, agian halakoetan agertzen ez diren detaile umoretsu ugari eskaintzen direlako, herensugea sortzeko errezeta barne.
Haur eta gazte literatura. 'Frankitxoren maskota berria'
Godzilla Nozilla
Idazlea: Alaine Agirre eta Xabier Mendiguren. Ilustratzailea: Belatz. Argitaletxea: Elkar.
Iruzkinak
Ez dago iruzkinik
Ordenatu
