Italiako Giroa

Euria, zoria eta loria: Narvaez nagusi Giroan

Ineoseko ekuadortarrak Padun iheskidearen zulatua baliatu du azken kilometroetan. Oso giro petrala izan da, eta liderrak otzan aritu dira
Jhonatan Narvaez helmugaratzen eta garaipena ospatzen, atzoko etapan.
Jhonatan Narvaez helmugaratzen eta garaipena ospatzen, atzoko etapan. BERRIA Tamaina handiagoan ikusi

Eñaut Agirrebengoa -

2020ko urriak 16

Euritan dantza egin zuen atzo Jhonatan Narvaezek (Ineos), Cesenaticon, Marco Pantani zenaren sorterrian hasi eta bukatu zen etapan. Izan ere, zaparradaz gain, Giroan besoak altxatzeko aukera erori zitzaion zerutik. Etapa batzuk indarrez irabazten dira, eta beste batzuk adimenez, baina atzokoa zorteak erabaki zuen. Zori ona zorion bihurtu zen Narvaezentzat, eta, aldi berean, zori txarra, zoritxar Mark Padunentzat (Bahrain). Ukrainarrak zulatua izan zuen 24 kilometroren faltan, ekuadortarrarekin batera lasterketa buruan zela, eta hortxe apurtu zen lasterketa. Jazarpenean ahaleginak eta bi egin zituen Padunek, baina ito egin zen esfortzuan. Hala, Narvaezek aurrenekoz dastatu zuen loria itzuli handi batean. Hirugarren garaipena du Ineos taldeak aurtengo Giroan, Filippo Gannarekin lortutako bien ondotik.

Helmugara arrakastaz iritsi den seigarren ihesaldia borobildu zuen Narvaezek. Faboritoen taldeak ez dira gai izaten ari kontrol zorrotza ezartzeko, ez baitute horretarako gaitasunik. Hartara, bapo ari dira egiten etapa ehiztariak. Atzo NTT taldeak hartu zuen ekimena liderren multzoan, Domenico Pozzovivoren aukerak jorratzeko. Inoizko gorputzaldirik onenarekin dabil italiarra, Frantziako Tourra min hartuta utzi ondoren. Eta atzo bazuen non min egin, oso gogorra baitzen ibilbidea: bost mendate puntuagarri eta guztira bederatzi muino igo behar zituzten 204 kilometroetan. Lau izarreko etapa zen, eta izarrak ikusi zituzten txirrindulariek. Eguraldiak ere izan zuen zerikusirik horretan, euripean egin baitzuten egun ia osoa. Elastiko gutxi eta zira asko ikusi zen, eta etengabeak izan ziren ziklisten joan-etorriak taldeko autoetara.

Baldintza egokiak ziren epikaren bidetik Pantaniren oroipena goratzeko, baina baita faboritoen sugarra umeltzeko ere, eta halaxe gertatu zen. Pozzovivok ahalegindu beharra zuen taldeak eginiko lan eskergaren ostean, baina eraso hutsal bat besterik ez zuen egin azken mendatearen bukaeran. Eta gainontzeko hautagaiek ez zuten imintziorik txikiena ere egin. Jantziak behin eta berriz aldatu beharrean, erasoen bidez berotu zezaketen gorputza; haatik, beste baterako utzi zuten zalaparta. Pello Bilbao (Bahrain) onenekin izan zen berriro, azken txanpan bizikletaz aldatu behar izan zuen arren. Hirugarren jarraitzen du sailkapen nagusian, Joao Almeida (Deceuninck) liderrarengandik 43 segundora. Portugaldarrak sendo eutsi zion maglia arrosari beste egun batez.

Hamalau ziklista sartu ziren eguneko ihesaldian. Bertan ziren, besteak beste, Narvaez, Padun, Victor Campenaerts (NTT), Simon Clarke (Education First), Joey Rosskopf (CCC) eta Simon Pellaud (Androni). Hamahiru minuturen aldea lortu zuten, baina arrakastak ziurra zirudienean, NTT serio jarri zen tropelean. Aldea lau minutura murriztu zuen 50 kilometroren faltan. Oso aletuta zihoan onenen multzoa; hogei ziklista eskas besterik ez zen gelditzen. Ordea, erritmoa moteldu egin zuen tropelak harrapatutako Campenaertsek, eta ihesaldiak tartea ireki zuen berriro. Narvaez eta Padun bakarrik gelditu ziren buruan, eta etapa buruz buru jokatu behar zutela zirudienean, zulatua izan zuen ukrainarrak.

Gogotik jo zuen lasterketa burura itzultzeko, eta bederatzi segundora gerturatu zitzaion ekuadortarrari, baina amildu egin zen azkenerako: 1.08ra helmugaratu zen. Clarke izan zen hirugarren, 6.50era, eta hautagaiak 8.25era iritsi ziren, denak batera. Etapa finitu ostean jakin zenez, Education First taldeak Giroa igande honetan bertan bukatzeko eskatu zien UCIri eta lasterketaren antolatzaile RCSri, segurtasun burbuila arriskuan ikusten duelako. UCIk, oraingoz, entzungor egin dio eskaerari.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Osasunaren mendeurrena

Osasuna: mende bat pasioz taupaka

Eñaut Agirrebengoa

Osasuna bide zirraragarria eginda iritsi da ehungarren urteurrenera. Kemena eta borroka izan ditu beti ardatz, baita harrobiaren eta harmailen sostengua ere. Zaleen atxikimendua erabatekoa da, eta kluba bazkideena da oraindik ere. Osasun betean ospatuko du mendeurrena, garai berriei adi.

Txirrindulariak etapako lehen kilometroak egiten. ©LUCA ZENNARO / EFE

Irteeran izan da ikusmina, ez helmugan

Ainara Arratibel Gascon

Eguraldia eta luzera tarteko, txirrindulariek planto egin dute, eta etapa erdira laburtu da. Josef Cernyk irabazi du gaurko lasterketa

Joseba Ezkurdia eta Jokin Altuna, iazko azaroan, Lau eta erdiko Txapelketako finalerako pilota aukeraketan. ©I. URIZ / FOKU

«Ez gaituzte erabili»

Julen Etxeberria

Jokin Altunak eta Joseba Ezkurdiak diote «borondate onenarekin eta zentzuzko irtenbide bat bilatzeko asmoz» osatu dutela Pilotarien Elkartea

Cerny nagusi Giroan, eta Benett Vueltan

Cerny nagusi Giroan, eta Benett Vueltan

Ainara Arratibel Gascon

Txirrindulariek planto egin dute Giroan, eta etapa erdira murriztu da. Benettek atzetik etorrita irabazi du esprintean, Ejea de los Caballerosen.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna
Eñaut Agirrebengoa

Informazio osagarria

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna