Suedia igoko da Munduko Kopako podiumaren koska gorenera. Suediarrek 1-2 irabazi zioten atzo Ingalaterrari Nizan (Frantzia), hirugarren eta laugarren posturako partidan. Beraz, Eskandinaviako taldeak berdindu egin du duela bederatzi urte Alemanian jokatutako Munduko Kopan lortutako emaitza. Ingalaterrak, aldiz, laugarren postuarekin konformatu beharko du. Duela lau urte, Kanadan, hirugarren izan zen. Hala, koska bat egin du behera.
Irekiak izan ohi dira hirugarren eta laugarren posturako lehiak, irabazteko premia ez baita horren handia. Hala izan zen atzokoa ere. Suediarrek bi gol sartu zituzten jada 22. minutuan: Asllanik egin zuen lehena, 11. minutuan, eta Jakobssonek bigarrena, 11 minutu geroago. Ingelesak, ordea, gai izan ziren suspertzeko. Kirbyk 1-2koa lortu zuen 31. minutuan, eta, bost minutu eskas geroago, Whitek binakoa. Baina epaileak baliorik gabe utzi zuen aurrelari ingelesak sartutako gola jokaldia telebistaz ikusi ondoren, argudiatuta jaurti aurretik Whitek baloia eskuz ukitu zuela. Ia ordubete falta zen oraindik, baina ez zen gol gehiagorik izan.
Futboleko Munduko Kopa
Suediak 1-2 irabazi dio Ingalaterrari, eta hirugarren sailkatu da
Iruzkinak
Ez dago iruzkinik
Ordenatu