«Etxean ere» badagoelako zer salatu

'Mugak zabalduz' karabanak Hendaiako atxikitze zentroa gaitzetsiz abiatu du bere martxa. Tuterako bidea hartuko du gaur
Santiago zubian jarri hesia moztu eta paterak pasatzen utziz mugak zabaltzea aldarrikatu zuten atzo.
Santiago zubian jarri hesia moztu eta paterak pasatzen utziz mugak zabaltzea aldarrikatu zuten atzo. I.MIQUELESTORENA

Nora Arbelbide Lete -

2018ko apirilak 29
Ez direla urruneko kontuak bakarrik. «Etxean bertan» ere badagoela zer egin. «Hemen ematen diren praktika politiko eta ekonomikoak» salatzea; horra nola laburbiltzen duen Ongi Etorri Errefuxiatuak plataformak atzo abiatu zuen Mugak zabalduz Euskal Herriko karabanaren arrazoia. Erantzukizun hori modu konkretuan agertzea du hiru egun hauetako zer egina: «Instituzio lokalek politika hauen mantentzerako daukaten jokaera erakustea». Atzoko egunari dagokionez, Hendaian (Lapurdi), Irunen eta Andoainen (Gipuzkoa), eta Iruñean izan zituzten politika horien lekukoak.

Lehen hitzordua Hendaiako atxikitze zentroan izan zuten. Han 53 pertsona atxilotu baitituzte, ateak berriz ireki dituenez geroztik, joan den apirilaren 4an. «Inor ez da ilegala», oihu artean iritsi ziren hara. Lapurdiko Cimade eta Etorkinekin elkarteak ukan zituzten han lagun. Izan ere, Cimadek laguntza juridikoa eskaintzen du zentroan bertan, eta, horri esker, behatoki lana ere bete dezake. Eta elkarteak, hain zuzen, nabarmendu du nola automatizatua den bertara eramatea jendea. Inolako deliturik egin gabe, soilik beharrezkoak diren paperak ez izateagatik giltzapetuz. Arrazoietako bat eman zuen atzo Cimadeko Helene Ducarrek. Azaldu zuenez, joan den urrian Marseillan (Frantzia) bi ikasleren hiltzailea justu aitzin atxilotu zuten. Paper egokirik ez eta tokiko atxikitze zentrora bidaltzen saiatu ziren. Baina ez zen lekurik eta, azkenean, bestelako elementurik ez zeukatela eta, askatu zuten. Eta ondotik bi gazte hil zituen. Horren ondorioz, tokiko prefeta kanporatu zuen Frantziako Barne ministroak. Orduz geroztik prefeta guztiak «beldurtuak» direla esplikatu zuen Carrerek, eta, hortik, atxikitze zentroen «gainezkako» egoera. Bide batez, atxikitze zentroan adingabeen presentzia nabarmendu zuen. Egoera guztiak gaitzestekoak badira, adingabe horiena zinezko arazotzat hartu behar dela gaineratu zuen.

Atxikitze zentrotik atera eta Santiago Zubia izan zuen bigarren hitzordua karabanak, atzo. Bidasoaren gainetik, Frantziako eta Espainiako estatuen mugan gertatzen diren atxiloketak eta gehiegikeriak gaitzesteko. Sare horail bat zabalduz hesia markatu zuten, eta gero moztu, Mugak zabalduz lema sinbolikoki irudikatuz, eta «hesiak apurtu» aldarrikatuz.

Irunen, autobusak hartu, eta Andoinera ziren joan, Sapa enpresara. Armentzako osagaiak fabrikatzen dituzte han. Adibidez, tankeak lasterrago ibiltzeko piezak. Horiek gero, besteak beste, Saudi Arabiara salduak dira, eta Yemengo gatazkan erabiliak. Plataformako kideek salatu zuten Euskal Herrian, orotara, ehun bat armagintza enpresa daudela: «Gerrak hemen hasten dira». Industria hori gelditzea exijitu zuten.

Andoaindik Iruñera egin zuen karabanak, eta manifestazioa egin zuten, 2016ko urrian komisarian hil zen Elhadji Ndiaye senegaldarraren kasua salatzeko.

Gaur, Tuteran (Nafarroa) dute finkatua hitzordua. Hango tiro eremua salatu, eta Gasteizera bidea hartzekoa dute. «Hezkuntza mailako segregazioa» izanen dute aipagai han. Bihar, Bilbo aldean dute azken eguna. Zierbenako harresia gaitzesteko, besteak beste.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna
Nora Arbelbide Lete

Informazio osagarria

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna