Miarritzeko aireportua itxi egingo dute hilabeterako, pista berritu behar baitute

Otsailaren 4tik ez da hegazkinik ibiliko, segurtasuna areagotzeko obrak egingo dituztelako. Autobusa eskainiko dute Pariserako hegaldientzat
Otsailaren 4tik aurrera itxita egongo da aireportua.
Otsailaren 4tik aurrera itxita egongo da aireportua. ISABELLE MIQUELESTORENA

Garikoitz Goikoetxea -

2019ko urtarrilak 5
Milaka bidaiaren igarobidea itxita egongo da hilabetez, segurtasuna handitzeko obrak egin behar dituzte eta: Miarritzeko aireportua (Lapurdi) itxi egingo dute otsailaren hasieran, eta ez da hegazkinik ibiliko martxora arte. Pistan eraberritze lanak egin behar dituzte, aireportuko arduradunek jakinarazi dutenez. Milaka herritarrek jasango dute itxiera horren eragina: iazko otsailean, esate baterako, 60.000 lagun baino gehiago igaro ziren aireportutik. Bidaiari gutxieneko hilabetea da, hala ere.

Orain bi urte hasi zituzten Miarritzeko aireportua eraberritzeko lanak, eta pistan egingo dituzte obrak orain. Otsailaren 3a izango da azken zerbitzu eguna, igandea: gauean itxiko dute aireportua. Handik hilabetera, martxoaren 4an, berriro hasiko dira hegaldiak ematen, astelehenarekin. Bitarte horretan martxan izango dira aireportuaren inguruko zerbitzuak —autobus geltokia, aparkalekua eta alokatutako ibilgailuak hartzeko lekuak—, baina terminala bera itxita egongo da, eta hegazkinak ezin izango dira Miarritzeko pistan aireratu edo lurreratu.

Aireportuko arduradunek azaldu dute saiatu direla obrek ahalik eta eragin txikiena izan dezaten. Urtarrilean eta otsailean izaten dute bidaiari gutxien Miarritzen, eta eguraldi aldetik egokiagoa da otsaila. Horregatik erabaki dute hilabete horretako lehenbiziko astean bertan ekitea pistako obrei.

Aldaketak hegaldietan

Hegaldirik ez da izango Miarritzen, eta milaka bidaiarik jasango dute eragina. Pariserako hegaldien kasuan, autobus zerbitzua eskaintzea erabaki du Air France konpainiak. Paueko aireportuaren bitartez eskainiko ditu Pariserako joan-etorriak, eta autobusa jarriko du Miarritze-Paue arteko bidea egiteko. Pariserako hegaldi txartelak erosiak dauzkatenek dohainik izango dute autobusa.

Martxoan zabalduko dute berriro aireportua, baina aldaketak izango dira zerbitzuan. Maiatzetik aurrera, izan ere, Municherako hegaldiak eskainiko dituzte Miarritzetik, larunbatetan. Beste helmuga batzuk, berriz, kendu egin dituzte aireportuko eskaintzatik: Helsinki, Madril, Estrasburgo eta Chateauroux. Aldaketa horiekin, hogei helmuga eskainiko ditu urte berrian Miarritzeko aireportuak. Pariserako joan-etorriek biltzen dute jende gehien.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna