ZUZENDARIEN GALEUSCA

Maradonarentzat ere zaila

Martxelo Otamendi - BERRIAko zuzendaria

2020ko azaroak 29

Animatuta dago Espainiako aurrekontuen onarpen prozesua, aurrekoetan parte hartu ez zuten talde berriak agertu direlako futbol zelaian. Gurean, EH Bilduk —Maradona gogoan—, baloia hatz puntarekin jota, komunikabideetan astebete iraun zuen gola sartu zuen EAJren atean. Jokalari jeltzaleek, arbitroa inguratu, protesta ozena egin, eta lortu zuten arbitroak hurrengo jokaldietan haien aldeko jarrera edukitzea. Urteetako eskarmentua.

Araba, Bizkai eta Gipuzkoako herritarren interesak hobeto nork babesten dituen ligan, lotsagabetu egin zaio iaz mailaz igo zen EH Bildu orain arte kategoria horretan hamarkadatan bakarrik aritu den EAJri. Ukaezina da EH Bilduk Podemoseko marrazainaren laguntza daukala ahalegin horretan, arbitro nagusiak ondo begiratzen diola bezain ukaezina. Luze joko du partidak, eta, segur aski, bi luzapen eta penaltiak beharko dira irabazlea nor den jakiteko.

Katalunian, zelaian dauden taldeetako bik, Junts per Catalunyak eta CUPek, partidara ez aurkeztea erabaki dutenez, geratzen diren bietatik —ERC eta PDeCAT— ERCk ez dauka lehiakide zuzenik norgehiagoka horretan. Baina itzuliko partida Katalunian jokatuko dela jakitun —datorren otsailaren 14an izango da—, euskaldunen artekoa baino korapilatsuagoa da; aldi berean bi partida jokatzen ari direlako Kataluniako taldeak eta Espainiako pare bat ere bai (PsC-PSOE eta Ciudadanos), biak ahalegin handia eskatzen dutenak. Ez da komeni Comukoak ahaztea, hiruko futbol bila dabiltza.

Galizian, BNG da jokalari bakarra, ez dauka areriorik, baina partidatik kanpo geratzeko arriskua dauka, arbitroak ez dituelako gonbidatu, oraingoz, partidaren oinarrizko arauak adostera. Arbitroa aukeratu zutenean bai, orduan ezinbestekoa zen BNGren parte hartzea, baina orduko abstentzio batzuk orain baiezko direnez... Azken minutuan bada ere, deituko die arbitroak.

Futbolari argentinarraren argitasuna beharko da aurreikusteko nola geratuko diren azkenean aldi batera jokatzen ari diren txapelketak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.