300 g leka.
100 g azenario.
Kuiatxo bat.
Dozena bat gari zainzuri.
Bi dozena antxoa fresko.
Oliba olioa.
Lau baratxuri ale.
Gatza.
1
Barazki guztiak banan-banan ondo garbitu: guztiak zerrendatan moztu, eta erretilu batean jarri multzoka, nahasi gabe.
2
Lapiko bat urez bete eta sutan jarri, gatz pitin batekin. Irakiten hastean, lehenik lekak bota: su bizia mantendu beti, eta ez jarri taparik. Hamar minutura, azenarioak gehitu; bost minutura, zainzuriak eta kuiatxoak.
3
Beste bost minutura, atera barazki guztiak uretatik, eta pasatu ur freskoz beteriko beste ontzi batera, egoste prozesua moztu dadin. Horrela, kolore bizia mantenduko dute, eta barazkiak ez dira gehiegi maskalduko.
4
Barazkiak freskatzean, ur hotzetatik atera eta ondo iragazi, sobera duten ura kentzeko.
5
Antxoak garbitu, erditik ireki eta hezurra kendu. Plantxa edo zartagin zabal bat sutan berotzen jarri. Antxoak hiru bat txandatan frijitu plantxan, oliba olio eta gatz pitin batekin. Erretilu batera atera, eta gorde.
6
Beste zartagin batean, baratxuri xehatuak dantzan jarri, su bizian, oliba olio txorrotada batekin. Gorritzen hastean, egositako barazkiak gehitu, eta dena ongi nahasi, panatxe bat sortuz. Pare bat minutuz eduki su bizian.
7
Panatxea plateraren erdian jarri. Antxoak buztanik gabe jarri, argazkian bezala, eta xerra garbi-garbiak panatxearen gainean kokatu. On egin udaberri garaiko plater goxo honekin.
