Oriok etxeko estropada irabaztea ere lortu du

Oriok badaki arraunlari bat gutxiagorekin ere bandera irabazten. Benetan gertatua da, atzo, Orion bertan, Euskotren ligako zazpigarren jardunaldian. Lehiaketa horretako laugarren bandera astindu zuen, herrian, aurreneko aldiz, eta ez zen ezustea izan, nagusi izan delako aurtengo zazpi estropadetatik seitan. Batetik, irabazteko moduak sortu zuen harridura, eta, bestetik, ezusteko gertakaria gertatu aurretik egiten ari zen lan bikainak.

Hasi orduko hartu zuen abiadura bizkorra Txiki traineruak, eta etxean aritzearen grina bizigarri zela agerian utzi zuten arraunlariek. Bigarren kalean zen etxeko taldea, aurrenekoan Arraun Lagunak, hirugarrenean Donostiarra, eta laugarrenean Hondarribia. Estropada teknikoa zen, eta azkar menderatu zuen Oriok; ziabogan, Arrauni bederatzi segundo atera zizkion. Orduantxe hautsi zitzaion toleta Sandra Piñeirori, hankeko istriborrari, eta lan erdiak arraunik gabe egin zituen. Oztopo handi horren zama lau segundokoa izan zen, eta, bukaeran, Oriok 4,52 segundo atera zizkion Arrauni. Donostiarra izan zen hirugarren, eta azkena, Hondarribia. Gaur, Sestako estropadan ariko dira laurak (11:40, ETB1).

Deusturen lehena ETE ligan

Sestaon jokatu zuten atzo ETE ligako seigarren jardunaldia, eta Deustuk, sailkapenean bosgarren zenak, bigarren txandan arraun eginda, sasoiko lehen bandera astindu zuen. Oso lehia estua izan zen, azkeneko txandan irabazle izan zen Hibaikari 97 ehunen atera zizkiolako, eta Zumaiari, 1,56 segundo. Lider berria Hibaika da, Zumaiarekin berdinduta. Gaur, Orion dute estropada, 18:00etan, itsasoan.