Stefan Kagl konpositore alemaniarrak Suite vasca obra estreinatuko du Donostiako 82. Musika Hamabostaldian. Esteban Elizondo Organo Zikloaren koordinatzaileak jakinarazi zuen hori, atzo, zikloaren aurkezpenean. Beste estreinaldi bat ere izango da: Liudmila Matsyura errusiarrak mustuko du Alicia Diaz de la Fuentek sortutako Profecías II lana. Hamabost kontzertu egingo dituzte asteon, igandera bitarte.
Kaglek adierazi du «paisaiaren instrumentuek» inspiratu zutela Musika Hamabostaldiak enkargatutako konposizio hori sortzeko, baita jaialdiak erakutsitako euskal kanten melodiek ere. Etzi aurkeztuko du, Donostiako Artzain Onaren katedralean. Matsyurak, berriz, gaur interpretatuko du Diaz de la Fuenteren pieza, Zumaiako San Pedro parrokian (Gipuzkoa).
Elizondok nabarmendu du ziklorako propio egindako «obra ugari» emango dituztela. Aipatutakoez gain, beste sei kontzertu egingo dituzte Donostiako elizetan, eta beste lau Gipuzkoako lau herritan: Azkoitian, Azpeitian, Deban eta Tolosan.
Saio bereziak ere egingo dituzte. Gaur, organo eta elektronika nahasketa bat; larunbatean, koru emanaldi bat; eta igandean, F. W. Murnauren Sunrise (1927) filmaren emanaldia, Thierry Escaichek inprobisatutako musikarekin.
Donostiako 82. Musika Hamabostaldia
Hamabost kontzertu Musika Hamabostaldiko Organo Zikloan
Iruzkinak
Ez dago iruzkinik
Ordenatu