Eibar 2-1 Vila-real

Orellanaren orkestra

Eibarrek balio handiko garaipena lortu du Vila-realen aurka, azken minutuan Orellanak egindako golari esker. Sasoiko partida onena egin dute armaginek
Fabian Orellana Eibarreko jokalaria atzo Vila-reali sartutako garaipenaren gola ospatzen.
Fabian Orellana Eibarreko jokalaria atzo Vila-reali sartutako garaipenaren gola ospatzen. JUANAN RUIZ / FOKU

Aitor Manterola -

2019ko azaroak 1
Golak. 1-0: Kikek (62. min.). 1-1: Gerardek (88. min.). 2-1: Orellanak (95. min.). Epailea. Cuadra Fernandez. Txartel horiak; Vila-realeko Anguissa, Iborra, Quintilla eta Pau Torresi. Bestelakoak. 5.587 ikusle Ipuruan. Minutuko isilunea egin zen, 1988tik 2002ra Eibarreko presidente izan zen Juan Luis Mardarasen omenez.

Eibarrek izarrez bete zuen atzo Gau Beltza, eta, guztiek argi berezia egin bazuten ere, batek distira apartekoa eragin zuen: Fabian Orellanak. Txiletar jokalari trebeak sartu zuen garaipeneko gola, 95. minutuan, eta ondo merezitako saria jaso zuten jokalariak berak, partidako onena izan baitzen eta taldeak sekulako partida jokatu baitzuen Vila-realen aurka.

Bizirik da Eibar, eta bizirik dela erakutsi behar zuen atzo, aurreko larunbatean hondoa jo eta gero Valladoliden. Baina Jose Luis Mendilibarren jokalari multzoa azkar berpiztu da, hurrengo partidan, eta entrenatzaileak amestutako partida egin zuten jokalariek: «Gure ohiko moduan jokatu behar dugu», zioen bezperan Zaldibarkoak. Bai jokatu ere horrela jokalariek. Izan ere, gipuzkoarrek aspaldiko partida onena egin zuten, eta txiki utzi zuten aurkari indartsua.

Ondo egiten duen guztia ondo baino hobeto egin zuen atzo taldeak: aurkariaren zelaian jokatu, ez utzi kontrarioari gora iristen, presio eraginkorra egin, baloia hegaletara eraman, erdiraketak atera... Erremate eraginkorrak soilik falta izan zitzaizkion: denen desira, eta gutxik edukitzen duten hori. Hogeitik gora jaurtiketa egin, eta azken minutuan irabazi beharra eraginkortasun ezaren ondorio izan zen. Eta zailena eginda gero, aurretik jartzea, Vila-reali 88. minutuan gola oparitu izanaren ondorio ere bai.

Partida guztiek erakusten dute gero gerta daitekeenaren traza, eta atzokoak, hasteko, etxekoen ezina agerian utziko zuela ematen zuen: ezin golik sartu. Kikek 62. minutuan korner batean buruz baloia sarera bota ondoren, beste uste batek hartu zuen neurketa: ari zela Eibar bereak eta bi egiten, baina kanpokoak behin iritsita gai izango zirela berdintzeko. Are gehiago, Kikek 81. minutuan baloia langara bota zuenean. Gertatu egin zen kanpokoen inguruko ustea, eta Gerard Morenok berdindu ondoren, gutxi behar izan zuen Ekambik 93. minutuan 1-2koa sartzeko. Ia inork uste izan ez zuena gertatu zen gero.

Bi aurrelarirekin

Garaipenak hainbeste balio du hori lortzeko erabilitako bideak. Izan ere, azken denboraldietako Eibar ikusi zen Ipuruan, eta horretan eragina izango zuen Mendilibarren hautuak: bi aurrelari jarri zituen, Enrich eta Kike, eta bukatu ere horrela egin zuen, Orellanarekin eta Charlesekin. Valladoliden trenbidetik atera zen trena burdinen gainean da berriz, eta hiru puntuek adina balio du horrek.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna