Albistea entzun

Ignacio Robles. Suhiltzailea eta kontzientzia eragozlea

«Kontzientzia kontua izan zen, ez aldarrikapen ekintza bat»

Kontzientzia arrazoiengatik, lanaren alderdi bat bete gabe utzi du Roblesek: giza eskubideak urratzeko erabiliko diren armak bidaltzeko lanetan parte hartzea. Baina ez du uste horregatik suhiltzaile okerragoa denik.
MONIKA DEL VALLE / ARGAZKI PRESS

Zuberoa Iturburu Lopez-Pantoja -

2017ko apirilak 14 - Getxo

Suhiltzaile kabo da Ignacio Robles. Bizkaiko Foru Aldundiak txostena zabaldu dio martxoaren 13an, Bilboko portutik Saudi Arabiara bidaltzekoak ziren arma karga bat zamatu zutenean ez parte hartzeagatik. Bi eta lau urte bitartean lan eta soldatarik gabe egotera zigor dezakete.

Portuan material arriskutsua zamatzen denean, suhiltzaileek han egon behar al duzue?

Han egon behar du suhiltzaile zaintza talde batek, prebentzio gisa; protokoloak hala agintzen du. Arriskutsu gisa sailkatuta dagoen edozein gai izan daiteke material arriskutsua: produktu sukoiak, korrosiboak, erradioaktiboak edota pozoitsuak, baita lehergaiak ere. Ez badira lehergaiak, Poliziak ez du parte hartzen. Lehergaiak badira, Guardia Zibilak zaintza lana egiten du beti.

Edukiontzietan lehergaiak zeudela jakin zenuenean, beste kabo batek ordezkatzeko eskatu zenuen.

Edukiontzi asko zirela eta itsasontziak arabiar hizkiak zeuzkala ikusi nuenean galdetu nuen, eta baieztatu zidaten Saudi Arabiara zihoazen bonbak zirela. Pertsona hari esan nion ezin nuela parte hartu. Suhiltzaile gunera deitu nuen, haiei ere jakinarazi nien, eta aginduen zain geratu nintzen. Ez nion uko egin, soilik esan nuen kontzientzia arrazoiengatik ezin nuela parte hartu. Beste kabo bat bidali zuten, egoera konpondu zen, eta ez zen egon bestelako ondoriorik. Jardunean nabilen suhiltzaileen etxean, batzuek bazeukaten susmoa horrelako kargak zeudela, baina ez geneukan frogarik, eta ez genekien benetan zer gertatzen ari zen. Guri ez digute esaten zer gai daramaten edukiontziek.

Kontzientzia arrazoiak aipatu dituzu. Zergatik?

Ezin dut parte hartu giza eskubideak urratuko dituen zerbaitetan. Saudi Arabia Espainiako bonbak erabiltzen ari da Yemenen. Egoera horrek gainezka egiten dit. Egun hartan gertatutakoa kontzientzia kontua izan zen, ez zen izan aldarrikapen ekintza bat. Nik ez nuen uste gertaerak garrantzirik izango zuenik, eta ez nuen zabaltzerik nahi. Martxoaren 13an gertatu zen, eta hiru astean ez nuen izan berririk, egunkari batean txostenaren berri eman zuten arte.

Lehergaiak izan ez balira, zure ekintzak ondorio berak izango al lituzke? Gertaera larritzat joko lukete?

Ez dut uste. Adibidez, pertsona batek ezin badu liztorren habiarik kendu alergia daukalako, beste batek egiten du, eta inork ez du eragozpenik jartzen. Beste maila bateko kontua da, eta ez dauka zerikusirik, baina, kasu honetan, nik ezin nuen parte hartu, kontzientziak galarazten zidalako. Hala ere, gertaera larritzat jo dute. Arautegiaren arabera, lan eta soldata gabeko bi eta lau urte bitarteko zigorra ekar dezake. Bi umerekin eta hipoteka batekin, ez da egoera samurra niretzat.

Neurrigabeko zigorra deritzozu?

Erabat neurrigabea. Ezin parte har nezakeela esan nuenetik zamatzearekin jarraitu ahal izan zuten arte, hamabi minutu igaro ziren. Hamabi minutuko atzerapenagatik bi eta lau urte bitarteko lan etetea eskatzea ez da proportzionala; zentzugabea da. Beste edozer arrazoik ekar zezakeen hamabi minutuko atzerapena.

Dena den, babes handia jaso duzu.

Bai. Interneten sinadurak biltzen ari dira, Change.org plataformaren bidez; 147.000 jaso dituzte jada, izugarria da. Alderdi politikoren baten babesa ere jaso dut, baina batez ere, elkarteena eta norbanakoena.

Gertatu den guztiari buruz zer balorazio egiten duzu?

Batetik, egin nuena ekintza pertsonala izan zen; uste dut ez zuela hedapenik behar. Bestetik, jendea kontzientzia hartzen ari da Yemenen gertatzen ari denarekin, eta hori oso garrantzitsua da. Suhiltzaile sartu nintzen bokazioz, hamazazpi urte daramat lanean, eta sekula ez dut kexarik jaso. Baina nire lanaren alderdi bat ezin dut bete kontzientzia arrazoiengatik: giza eskubideak urratzeko erabiliko diren armak bidaltzean ezin dut parte hartu. Zintzoki, ez dut uste horregatik suhiltzaile okerragoa naizenik.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Bizkaiko Foru Aldundiaren jauregia. ©JAIZKI FONTANEDA / FOKU

Irregulartasunak sumatu dituzte lan eskaintza publiko batean, Bizkaian

Gotzon Hermosilla

Foru Aldundiak albaitariak kontratatzeko azterketetan izan da. Bederatzi hautagaitan bakarrak asmatu zituen kasu praktiko baten erantzun zuzenak. Salaketa bat jarri dute Fiskaltzaren aurrean

Hezkuntza batzordea bilduta, atzo, Eusko Legebiltzarrean. ©RAUL BOGAJO / FOKU

Ikastetxe publikoetan ikasten dute atzerrian jaiotako ikasleen %69k

Irati Urdalleta Lete

Emaitza okerragoak dituzte A eta B eredu publikoko ikasleek: erdiek ikasturteren bat errepikatu dute

Durangoko kaleak —Bizkaia— erdi hutsik, iazko urrian. ©ARITZ LOIOLA / FOKU

Konstituzionalak legez kanpokotzat jo du bigarren alarma egoera ere

Edurne Begiristain

Alarma egoera luzatzea eta eskumenak erkidegoen esku uztea legez kontrakotzat jo ditute. Urkulluk eta Txibitek «harridura» azaldu dute

Rcardo Etxepare (eskuinean), Noam Chomsky hizkuntzalaria agurtzen, 2006an. ©Imanol Otegi / Foku

EHUko udako ikastaroetako zuzendari ohi Ricardo Etxepare zendu da

Gotzon Hermosilla

Bizitza unibertsitateari lotua eman zuen, baina politikan ere aritu zen, eta Irungo alkatea izan zen bolada labur batez

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.