Inoiz ez zuen itxaropena galdu. 38 urte eman ditu semearen bila, baina Jose Miguel Etxeberria Naparra-ren gorpua topatu gabe zendu da haren ama Celes Alvarez (89 urte). «Badakit Jose Miguel hila dela, baina aurkitu egin behar dut; bestela, sekula ez dut itxaropena galduko. Eta orain arte atxilotuta, nonbait ezkutatuta izan balute?». Naparra 1980ko ekainaren 11n Ziburutik (Lapurdi) eraman zutenetik galdera horrek zigortu zuen haren ama. Hasieran, Komando Autonomo Antikapitalistetako kidea izaki, atxilotu egin zutela uste izan zuten; baina Baionako polizia etxean ez zegoela egiaztatuta, bestelako susmoak piztu ziren.
Orduko hartan, hamasei urte zituen Naparraren anaia Eneko Etxeberriak, eta, amaren modura, urte asko egin ditu gorpuaren bila, egiaren bila. «89 urte ditu [amak]. Aste bat urte bat balitz bezala da harentzat. Tematuta dago, baina itzaliz doa. Anaia aurkituko bagenu, atseden hartuko luke», esan zion Eneko Etxeberriak BERRIAri iragan abuztuan, bilaketak amarengan utzitako lorratzaz.
Duela bi urte aukera gertu ikusi zuten. 1980ko hamarkadaren hasieran ETAren-eta aurkako «estatu terrorismoarekin» lotutako pertsona batek zioen gorpua Mont-de-Marsan (Okzitania) ondoko udalerri batean zegoela. Bilaketa lanek ez zuten emaitzarik eman; eta Celes Alvarezek, ezin atseden hartu.
HILBERRIA. Celes Alvarez
Semearen gorpua topatu gabe joan da
Iruzkinak
Ez dago iruzkinik
Ordenatu