Kataluniako prozesu subiranista. Europako Parlamentua

Gorenaren erabakia dela eta, Sassolik hutsik utzi du Junquerasen eserlekua

Parlamentuko presidenteak diputatu izaera aitortu die Puigdemonti eta Comini. Espainiako Auzitegi Gorenak bidalia du suplikatorioa
David Sassoli Europako Parlamentuko presidentea, atzoko saioan.
David Sassoli Europako Parlamentuko presidentea, atzoko saioan. BERRIA Tamaina handiagoan ikusi

Paulo Ostolaza -

2020ko urtarrilak 14

Jakin-mina piztu zuen David Sassoli Europako Parlamentuko presidenteak Toni Cominen eta Carles Puigdemonten lehen saioan esan beharrekoak. Saioaren hasieran hitz egin zuen politikari italiarrak, eta, bere hitzek ahalik eta erreakzio gutxien sortze aldera-edo, beste hainbat gairekin batera aipatu zuen Kataluniako bi buruzagi subiranistena, gaiaren inguruko mintzaldirik ez egoteko, eta ez zuen azalpen handirik eman. Halere, txaloak eta protestak izan ziren Comin eta Puigdemont aipatu zituenean. Beste biak bezala, Oriol Junqueras Kataluniako presidenteorde ohia ere eurodiputatua zela esan zuen —Luxenburgoko epaitegiak esandakoari jarraituz—, baina, Espainiako Hauteskunde Batzordearen erabakiaren ondorioz, hutsik utziko zuela Junquerasi zegokion eserlekua. Sassoliren arabera, Junquerasek joan den urtarrilaren 3an galdu zuen diputatu izaera.

ERCko liderrak errekurtso bat jarriko du Europako Batasuneko Berme Auzitegian, Europako Parlamentuaren erabakiaren aurka. Eskaria onartu ezean, Junquerasek parlamentari izateko aukera galduko luke; zerrendako hurrenak hartuko luke haren lekua, Jordi Solek.

Suplikatorioa

Aurreikusi bezala, Gorenak jada bidali du Europako Parlamentura suplikatorio bat izapidetzeko eskaria, Puigdemont eta Comin epaitu ahal izateko. Pablo Llarena epaileak joan den ostiralean adostu zuen suplikatorioa tramitatzea. Diputatuek baiezkoa ematen badute, bi buruzagi subiranistek duten immunitatea galduko dute.

Dena den, suplikatorio bat onartzeko prozesua konplexua da, eta hala azaldu zuen Jaume Duch parlamentuko bozeramaileak: «Dokumentua duela gutxi heldu da. Irakurriko dugu, eta beti egiten duguna egingo dugu: behar dugun denbora hartu gauzak ondo egiteko». Horrez gain, argi utzi zuen Estrasburgok ez duela «politikarik egiten» Kataluniako aferarekin, eta Europako Justizia Auzitegiaren, Espainiako Auzitegi Gorenaren eta abarren erabakiak «errespetatu eta jarraituko» dituztela. Ondorioz, prozesua etenda geratu da Sassolik datorren saio batean batzarrari dokumentua jaso dutela adierazi bitartean.

Behin hori egindakoan, zuzenbide gaietarako batzordeak txostengile bat izendatuko du, informazioa biltzeko prozesua hasteko. Jasotako informazioa eta akusatuen adierazpenak aztertu ondoren, baiezko edo ezezko gomendio bat igorriko du komisio horrek, eta, azkenik, Europako Parlamentuak bozkatuko du indargabetzea onartu ala ez.

Prozesua ez da laburra izaten. Normalean, hilabeteak igarotzen dira suplikatorioak onartzerako. Lider subiranisten kasuan, gainera, gaia oso politizatuta dago; hortaz, zeresan handia eman lezake, eta posible da prozesua ohi baino konplexuagoa bilakatzea eta luzeagoa izatea.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Nekane Murga Jaurlaritzako Osasun sailburua agerraldi batean. ©Javier Etxezarreta/EFE

Murga: «Hau bigarren olatua da»

Olatz Esteban Ezkati

Azken orduetan nabarmen ugaritu dira kasuak Araban, Bizkaian eta Gipuzkoan. 338 positibo atzeman dituzte.

Aguraingo plaza. ©Aritz Loiola/FOKU

Aguraingo Kokolo tabernan izan direnei proba egitera joateko eskatu die Jaurlaritzak

Berria

Uztailaren 29tik abuztuaren 2ra han egon zirenei egin die deia.

Haurrak eta hezitzaile bat Baztango haur eskolan. ©JAGOBA MANTEROLA / FOKU

Haur eskolak talde iraunkorrekin abiatuko dira Nafarroan

Olatz Esteban Ezkati

Lau egoera posible irudikatu ditu Hezkuntza Sailak, eta COVID-19aren bilakaeraren arabera ezarriko da bat edo beste. Jantoki zerbitzua bermatuko dutela esan du gobernuak

Pentsiodunek agerraldia egin zuten, atzo, Justizia jauregiaren aurrean, Bilbon. ©ARITZ LOIOLA / FOKU

Pentsiodunek pandemiako testigantzen txostena aurkeztuko diote fiskaltzari

Maialen Arteaga

Irailaren 7an bilduko dira Arabako, Bizkaiko eta Gipuzkoako fiskalarekin, pandemiako testigantzak biltzen dituen txostena emateko

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna