Italiako Giroa

Marianne Vos ez da inoiz erlaxatzen

Hirugarren etapa garaipena lortu du aurtengo Giroan, eta bere ibilbideko hogeita laugarrena. Van Vleutenek sendo eutsi dio lehen postuari

Imanol Magro Eizmendi.
2019ko uztailaren 12a
00:00
Entzun
Marianne Vos (CCC) aseezina da. Munduko txapeldun ohia garaipenak pilatzeko makina da. Gaur egun ez du garai bateko aginterik tropelean, baina etapa solteetan edo egun bateko probetan ia ez du parekorik. Italiako Giroa da, gainera, haren proba kutuna. Hiru aldiz irabazi du sailkapen orokorra (2011, 2012 eta 2014), eta etapa garaipen bilduma izugarria du. Atzo, San Giorgio di Perlenan (Italia), ibilbideko hogeita laugarrena lortu zuen, eta aurtengo Giroko hirugarrena. Ohituta dago urte oparoetara, bost aldiz lortu baititu hiru garaipen ekitaldi berean.

Vos hamar minutura dago sailkapen nagusian, eta horrek mesede egin zion atzo libreago mugitzeko. Etapa amaiera eraso festa izan zen, eta azkenekoan laukote batek egin zuen aurrera. Bertan ziren Annemiek van Vleuten (Mitchelton) liderra eta Anna van der Breggen (Boels) bigarren sailkatua ere. Azken metroak aldapa gora ziren, eta igoera pikoan Vos izan zen indartsuena eta trebeena. Van der Breggen izan zen bigarren. Sei segundo urratu zizkion Van Vleuteni, eta, are garrantzitsuagoa dena, bederatzi Katarzyna Niewiadomari (Canyon). Biak lehian ari dira bigarren izateko, eta orain alde txiki bat du. Ane Santesteban, ondo kokatuta (Rotor), bederatzigarren izan zen. Gaur 133 kilometro egingo dituzte, gorabehera askoko ibilbide batean.
Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.