Jon Redondo Eusko Jaurlaritzako Kirol zuzendariak gutun bat bidali dio Euskal Pilotaren Nazioarteko Federazioari. Bertan, Redondok gaitzetsi egin du erakunde hark Bixintxo Bilbaori ezarritako zigorra, eta kentzeko eskatu dio. Kirol zuzendariaren iritziz, «erabakiak zigorraren legezkotasuna bera ezbaian jarri du, eta ez du lagunduko euskal pilotaren jardueran inplikaturiko eragile guztien —publiko zein pribatu— arteko harmonia eta elkar ulertzea lortzen».
Redondok nabarmendu duenez, «Eusko Jaurlaritzaren ikuspegitik, harrigarria da kirolariaren egintza arau hauste larritzat jotzea, ikurrina era orokorrean ofizialki aitortua dagoen lurralde baten banderari dagokion ikurra dela kontuan hartuta».
Urtebetez nazioarteko lehiaketetan aritzeko debekua jarri diote Bilbaori, eta, hain zuzen ere, zigorraren «proportziogabetasuna» kritikatu du Redondok. «Zigorraren legezkotasunaz harago, dudarik ez dago ere proportziorik gabeko neurri baten aurrean gaudela». Aurretik Rebeka Ubera EH Bilduko parlamentaria izan da pauso hori emateko eskatu diona Jaurlaritzari, eta beharrezko kudeaketak egin ditzala zigorra ken diezaioten.
Gasteizek zigorra kentzeko eskatu dio Nazioarteko Federazioari
Jon Redondoren iritziz, «erabakiak zigorraren legezkotasuna bera jarri du ezbaian, eta ez du lagunduko kirol horretan elkar ulertzea lortzen»
Iruzkinak
Ez dago iruzkinik
Ordenatu