'Argibideak'

Azken urteetan sortu diren euskal ska-rock talde zenbaitek pop eta elektronika dantzagarria eginez bukatu dute. Joerak ez du zeharo harrapatu Uribe Kostako Guda Dantza banda, oraindik. Argibideak hirugarren diskoak ondo erakusten du nondik datozen eta, akaso, nora doazen. Garun antzuen festa, Luz edo Naturaltasun artifiziala abestiek ska musikarekiko duten lotura erakusten dute. Betagarriko Iñakiren kolaborazioa eta Joxe Ripiau taldeari erreferentzia dira horren eredu. Eragin zerrenda, ordea, zabalagoa da, funk (Oihan sakonean), elektroniko (Blade Runner), cumbia (Los rendidos) eta swing (Gezurren balak) doinuei esker. Hitzak, berriz, sistemak eragindako zapalkuntzaren kontrakoak dira. Alain Berazaren ahots atseginak, berriz, abestion mezuak ederki transmititzen ditu.