Grebalariek ez dute Baikoren inolako berririk

Baikoko hamabost pilotarik deitutako grebako bosgarren eguna izango da gaurkoa. Enpresak hiru partidako jaialdia antolatu du gaurko, Bilbon, 19:30ean: hasteko, Agirrek eta Arangurenek buruz burukoaren atarikoa jokatu beharko lukete; jarraian, Bengoetxea VI.a-Ibai Zabalak eta Bakaikoa-Albisuk binakako lehia; eta, azkenik, Urretabizkaia II.ak eta Salaverri II.ak buruz burukoa. Baina Baikoko pilotariek ez dute jokatuko. Grebalarien ordezkariek jakinarazi dutenez, ez dute Baikoren inolako berririk.