Sei euskal talde ariko dira Espainiako Kopako bigarren kanporaketan, urtarril hasieran: Osasuna, Alaves, Eibar, Portugalete, Amorebieta eta Mutilvera. Aldiz, bost geratu dira bidean lehen kanporaketan: Cantolagua, Sestao, Leioa, Anaitasuna eta San Juan.
Mutilvera eta Eibar izan dira azkenak sailkatzen. Atzo egin zuten. Mutiloabeitiko (Nafarroa) taldeak 1-0 irabazi zion Racing Santanderri. Ezustea da, aurkaria Bigarren B Mailako talderik indartsuenetakoa baita. Baina Javier Briñolek 76. minutuan sartutako gol batek garaipena eman zion Mutilverari, baita sailkapena ere. Hurrengo kanporaketan Lehen Mailako talde bat izango du kontrario.
Eibar izan daiteke horietako bat. Gipuzoako taldeak ondo egin zituen atzo etxeko lanak: 0-2 irabazi zion Racing Riojari Haron (Espainia). Hiru koska daude baten eta bestearen artean, baina ez zen egon horrenbesteko aldea zelaian. Pedro Leonek sartu zituen partidako bi golak: lehena, buruz, 36. minutuan, eta bigarrena, jaurtiketaz, 82. minutuan.
Ezustekoa gertu Txerloian
Anaitasuna ere Getafe baino hiru koska beherago dago, baina Azkoitiko (Gipuzkoa) taldea ezusteko galanta ematear izan zen Txerloian. Markel Eskurtzak aurretik jarri zuen etxeko taldea 55. minutuan, eta beldurra sartu zion Getaferi. Horrenbeste, ezen Jose Bordalasek lau aldaketa egin zituela ia kolpe batez. Ondo atera zitzaion, Getafek buelta eman baitzion emaitzari: Enes Unalek banakoa egin zuen, 73. minutuan; eta Angelek 1-2koa penaltiz, 94. minutuan. Galdu arren, txapela kentzeko lana egin zuten Anaitasunakoek. Iruñeko San Juanek, ordea, ez zuen aukerarik izan, eta 0-2 galdu zuen Granadaren aurka.
