Albistea entzun

Qatarko Munduko Kopa

Belgika eta Alemania, etxera

Stephanie Frappart epailea, aginduak ematen. Lehen arbitro emakumea izan da gizonen Munduko Kopan.
Stephanie Frappart epailea, aginduak ematen. Lehen arbitro emakumea izan da gizonen Munduko Kopan. G.LICOVSKI / EFE Tamaina handiagoan ikusi

Jon Ander De la Hoz -

2022ko abenduak 2

Munduko Koparen atariko kinieliei erreparatuz gero, inor gutxik aurreikusia zuen atzo jazotakoa. Japoniak pronostiko guztiak hautsi zituen E multzoan, eta sailkapeneko lehen postua eskuratuta igaro da final-zortzirenetara. Gauza bera gertatu zen, aurrez, F multzoan; Maroko sailkatu zen gorengo koskan, Kroaziaren kaltetan. Aldiz, txapelketan ondo aritzera deitutako bi selekziok nahi baino lehen amaitu dute Qatarko jarduna. Alemania da bat, eta Belgika bestea.

Batez ere, alemaniarren kaleratzeak eman du hizpidea. Ez alferrik, une askotan aurrera egiteko moduan izan baitziren. E multzoko talde guztiek zuten aukera aurrera egiteko, eta mataza hori askatzen lanak izan zituzten guztiek ere. Azkenerako, Alemaniak irabazi egin zion Costa Ricari (4-2), baina hirugarren postuan sailkatu zen. Stepahnie Frappartek gidatutako partidan, europarrek gutxika-gutxika lortu zuten gailentzea. Epaile frantziarra izan zen Munduko Kopa bateko norgehiagoka bat zuzendu zuen lehendabiziko emakumezkoa.

Ordea, E multzoko bi partiden arteko emaitzen matematikek piztu zuten iluntzeko sua. Espainiak kale egin zuen Japoniaren aurka, eta, une batez, Luis Enrique Martinezen taldea txapelketatik kanpora geratzeko arriskuan izan zen. Ez alferrik, Japonia nagusi izan baitzen bi selekzio horien arteko partidetan. Espainiarrek aurrea hartu zuten arren, asiarrek irauli egin zuten neurketa, eta horrek zabaldu zuen zalantzarako atea. Realeko Take Kubo hasieratik aritu zen japoniarrekin, eta gauza bera egin zuten Athleticeko Unai Simon atezainak eta Nico Williams aurrelariak, Espainiarekin. Gauza bera egin zuen Cesar Azpilikuetak ere.

Hutsa, mikatza eta gozoa

Aurrez, matematiketarako beharrik ez zen izan F multzoko jardunaldi erabakigarrian. Azken partidetako emaitzei zor, Belgika izan zen multzoen faseko kaltetuenetako bat. Urrezko belaunaldiko jokalariak etxera itzuliko dira, Kroaziaren aurka hutsean berdindu eta gero. Berdinketa batek gutxitan eragiten du halako aldarte ezberdina: balkaniarren poza, sailkatu direlako, eta belgikarren pena. Kalera joan ziren, asmatu ezinagatik.

Izan ere, Romelu Lukakuk asko huts egin zuen neurketan, eta negarrez utzi zuen zelaia. Belgikak gol bakarra nahikoa zuen aurrera egin eta Kroazia bidean uzteko, baina ez zuen alerik egin. Belgikaren kanporatzeak berehalako ondorioa izan zuen selekzio horretan; ametsa eteteaz gain, azken urteetan taldearen gidari izan den Robert Martinez teknikariak kargua utzi du. Hautatzaileak partidaren ostean eman zuen erabakiaren berri, prentsa aretoan.

Hein batean, Maroko izan da deskalabru horren eragilea. Afrikako selekzio hori izan da F multzoko talderik onena. Irabazi egin ditu jokatutako hiru partidetatik bi, eta berdindu egin du bestea. Atzo, hiru puntu gehiago bilduta amaitu zuen ligaxka. Munduko Kopa eskasa osatu duen talde bat menderatu zuen, Kanada (1-2). Garaipenari esker, lehen postuan gainditu du lehendabiziko fasea. Walid Regraguik balentria egin zuen hautatzaile kargua zuenetik hiru hilabete bete ziren egunean.

Behin final-zortzirenetako sailkatuta, Marokok bide beretik segitzea izango du xede. Espainiaren aurka ariko da lehendabiziko kanporaketan. Kroaziak, berriz, Japonia izango du kontrario. Gaur erabakiko dituzte G eta H multzoetako sailkapenak. Bi-bietan, lusofonoak dira sailkatutako bakarrak: Brasil batean, eta Portugal bestean. Gainontzeko taldeek eutsi egiten diote sailkatzeko esperantzari.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©JAIZKI FONTANEDA / FOKU

«Giro onak lagundu digu prestatzen eta gozatzen»

Jon Ander De la Hoz

Azurmendik eta Alberdik irabazi dute Sherpa Airen binakako txapela. Biei «ilusioa» egin die elkarrekin gailentzeak. Finalean egindako lan ona azpimarratu dute.
Teresa Errandonea atleta Donostiako belodromoan. Bertan entrenatzen da eguraldi txarra dagoenean. ©JAGOBA MANTEROLA / FOKU

Erori, zutitu, eta jauzi egin

Beñat Mujika Telleria

Min hartuta egotea zaila izaten da kirolarientzat, baina soleoan izandako lesioa atzean utzita, sasoiko itzuli da Teresa Errandonea hamar hilabeteren ostean.
<b>Realeko jokalariak igandean sartutako goletako bat ospatzen.</b> ©LA LIGA

Balio handiko partida

Ainara Arratibel Gascon

Realak atzeratutako liga partida jokatu du gaur Real Madrilen zelaian. Txuri-urdinek segida eman nahi diote igandean lortutako garaipenari

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Jon Ander De la Hoz

Informazio osagarria

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.