EITBko zuzendaritza taldea, Iturberekin

Eusko Legebiltzarrak Maite Iturberi dimititzeko eskatuko ziola aurreikusita, haren kudeaketa babesteko agiria plazaratu zuen asteazken gauean EITBko zuzendaritza taldeak. Irrati telebista publikoa «alderdien arteko debate politikoan bakoitzak bere interesen mesedetan» erabiltzea salatu zuten agiriaren sinatzaileek. Erakundearen «funtzionamendu normala asaldatzen eta erakundeari kalte egiten dioten jokabideak eta adierazpenak» gaitzetsi zituzten. Beste agiri bat plazaratu zuen atzo EITBk, gogoratzeko enplegu deialdi publikoa Administrazio Kontseiluak hartu zuela, EH Bilduren aldeko botoekin eta PSE-EEren abstentzioarekin. PPk bakarrik bozkatu zuen aurka.