UPN: «PSNri emanez gero botoa, Asiron izango da Iruñeko alkate»

Nafarroako banderatxoak astintzen ziren bitartean, Javier Esparza Nafarroako Gobernuko presidentegaiak egungo gobernuarekin eta PSNrekin atsekabetuta daudenen botoa eskatu zuen, baita zentro eskuinean aldaketa nahi dutenena ere. «Gu gara benetako alternatiba bakarra. Edo Txibitek Bildurekin gobernatzen du, edo UPNk Javier Esparzarekin. Ez dago beste aukerarik». Cristina Ibarrola Iruñeko alkategaiak ere antzeko mezua eman zuen, eta hark ere Joseba Asiron Iruñeko alkate izatea nahi ez dutenen botoa eskatu zuen, ohartarazita Elma Saiz alkategai sozialistaren aukera bide itsu bat dela: «PSNri emanez gero botoa, Joseba Asiron izango da Iruñeko alkate»

Nafarroa Arena aukeratu zuen UPNk kanpainako ekitaldi nagusia egiteko, eta horrekin indar erakustaldi bat egin nahi izan zuen atzo. «Gu gara horrelako ekitaldi bat egin dezakegun bakarrak», esan zuen, harro, Esparzak. Ehunka militante, zortziehun inguru, elkartu zituen pabiloian. Izarrak balira bezala, Pet Shop Boysen Go West kantaren akorde ezagunak jotzen ari zirela, eskaileretan behera jaitsi ziren Esparza, Ibarrola, Enrique Maia UPNko presidenteordea eta Yolanda Ibañez idazkari nagusia. Alderdikideen artean, Miguel Sanz presidente ohia zegoen.

Kanpaina osoan egin bezala, EH Bildu izan zuen une oro ahoan Esparzak. Haren hitzetan, aurreko bi legealdietan «EH Bilduren eskuetan» egon da Nafarroako Gobernua: «Legealdi honetan, Txibitek zuzentzen duen gobernuak ez du lurralde hau hobetu, EH Bilduren eskutik zerutik baino infernutik erori zitzaion aukera bat galdu du, eta nafarrek hautetsontzietan ordainaraziko diogu. Txibitek aukera galdu du, eta ez du berriro izango». Gaineratu zuenez, «EH Bildu lurralde honetako giltza izatearen aldeko botoa da PSNren aldekoa».

Inkestek gobernatzeko aukerarik ematen ez badiete ere, egungo gobernuarekin kontentu ez diren herritar eta kolektiboen babesa lortuko duela sinetsita dago Esparza, edo, bederen, agerian utzi nahi izan zuen hori. Duela lau urte EH Bildurekin hitzartu zuelako PSNri botoa eman zietenen babesa eskatu zuen. Gogora ekarri zuen 2019an orduko inkestek esaten zutena baino babes handiagoa lortu zuela Navarra Sumak, eta orain ere UPNk gauza bera egingo duela uste du.

«PSN honekin», ez

Azkenik, boto baliagarriaren alde egin zuen. Haren esanetan, «Txibiteri, Asironi, Otegiri eta Sanchezi mesede egiten zaie» eskuineko beste alderdietan botoa sakabanatuz gero. Ohartarazi zuen «PSN honekin eta Txibiterekin» ez dutela itunik egingo.