Deitu egun handietan

Peio Larraldek finalak jokatzen espezialista dela erakutsi du. Txapelketa ona ez egin arren, partida erabakigarrian eman zuen bere onena.
Peio Larralde, pilota probatzen, finaleko aukeraketan.
Peio Larralde, pilota probatzen, finaleko aukeraketan. ISABELLE MIQUELESTORENA

Imanol Magro Eizmendi -

2018ko martxoak 1
Egun handietako pilotaria da Peio Larralde (Hazparne, Lapurdi, 1993), final eta jaialdi handietan hazi egiten denetakoa. «Baina horiek jokatzeko ailegatu beharra dago!», zehaztu du umoreko. Trinket zale gehienek berataz duten iritziaren zergatia azaldu du. «Ikasi egin dut goi mailako partidak jokatzen. Finala-eta ondo jokatzen ikasi dut, eta uste dut horretan egin dudala gehien hobera». Iragan igandean bigarrenez izan zen buruz buruko txapeldun, eta, finala ikusita, ondo baino hobeto du ikasia finalen lezioa.

40-18 irabazi zion Mathieu Ospitali Baionan. Aurkaria zen faboritoa, ligaxka lehen postuan bukatu zuelako, eta aurreko bi hilabeteetan bi aldiz irabazi ziolako Larralderi buruz buru. «Baina finalak beti dira ezberdinak», esan du txapeldun berriak. «Nik nahiko ongi asmatu nuen hasieratik, eta hamar bat tantoren aldea lortu nuen. Bera, aldiz, lotsatuta irten zen. Plazera ematen du partida handietan ondo jokatzeak».

Modernek bere jokoari mesede egiten dio, baina hori ez da aski 40-18 irabazteko. Manu Martiarena sei aldiz buruz buruko txapeldun izandakoarekin eta haren aitarekin entrenatzen da Larralde, eta aholku onak jaso zituela dio. «Lasai irteteko esan zidaten. Lasai irtenda, ondo hasiko zara, eta garrantzitsua da. Iristea gauza handia zela esan zidaten, eta pilotari anitz geldituak zirela bidean».

Izan ere, iristea ere ez zen gutxi. Larralde duela bi urte buruz buru txapeldun izan zen, baina iaz ez zen finalean sartu, eta aurten kostata sailkatu zen. «Azken hilabetean bi partida galdu, eta hilik ez, baina asko hasi ziren esaten Peio Larraldek ez zuela bere maila emango. Baina ni berdin ari nintzen entrenatzen, eta jendeak esaten zidan maila itzuliko zela». Finalaren aurreko azken partidan, 40-38 irabazi zion Bixintxo Bilbaori, eta orduan itzuli ziren zantzu onak. Finalean goia jo zuen.

Larralde esku pilotako koadroko aurrelari onena da, binakako txapelduna eta belaunaldi berriko ikurrik handienetako bat. «Horrek sortzen du presioa», onartu du. Jendeak beti espero du onena harengandik. «Baina zaleak ere ulertu behar du ez dela normala urte osoan sasoi betean egotea. Iaz 50 partidatik gora jokatu nituen, eta denok izaten ditugu gorabeherak». Eta txapela irabazita? Zama handitu egiten al da? Barre egin du. «Ez, txapela irabazteak ez du zamarik gehitzen; aitzitik, arindu egiten du. Txapelarekin gozatu egin behar da, askok nahi dute, eta bakarrak lortzen du».

Hurrengo erronka binakakoa du, martxotik aurrera. Ion Iturbe Bigarren Mailako buruz buruko txapeldunarekin jokatuko du. «Seinale ona da gazteenarekin jokatzea, sinatuko nuke urtero», bota du lotsagabe. Bikoteak dagoeneko ezagunak dira, eta txapelketa orekatua espero du. Hala ere, bota du zeintzuk diren faboritoak: «Waltary eta Gixandut. Iaz txapeldunorde izan ziren, eta Baionako Mastersa irabazi zuten».

Trinketa, hobera

Txapelduna da Larralde, eta, horrenbestez, trinket profesionalaren egoera neurtzeko pertsona aproposa. «Hobera egin du trinketak. Urte gogorrak pasatu zituen, baina apurka jendea ari da pilotalekura itzultzen, eta pilotari gazte asko daude». Eredu gisa Hazparne trinketa jarri du. Jabe berriak goitik behera aldatu du, beirazko pareta eta guzti, eta 800 eserleku ditu orain. Bizi berritzearen arduradun nagusia zein den ere garbi du: «Esku pilotako elkarteak lan handia egin du, hark eman dio buelta egoerari».

Era berean, Larralderen ustez, Ipar Euskal Herriko pilotariak jada ez dira hegoaldera begira bizi. «Xalaren eta Gonzalezen garaian gehiago pasatu zen hori. Orain, Etxegoin dago Asegarcen, baina iparraldeko pilotariek ikusi dute diru aldea orain ez dela hain handia, batez ere ezkerparetako Bigarren Mailakoekin alderatuta. Diru pixka bat irabaz daiteke». Hori bai, pena ematen dio hegoaldean trinketak duen oihartzun urria, eta, esaterako, ETBk finala zuzenean ez eman izanak. «ETBk gehiago egin zezakeen trinketaren alde. Urteak dira ez duela finala zuzenean eman, ez dakit interesik duen. Trinket ederrak daude egun Iparraldean, telebistarentzako aproposak».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna