Albistea entzun

PRENTSAREN TRANTSIZIO DIGITALA IV. Gumersindo Lafuente. Kazetaritza digitalean aditua

«Euskara aukera izan daiteke, ez muga»

Espainian gehien saltzen diren egunkarietako edizio digitalak aldatzeko prozesuetan parte hartu zuen. Bere kabuz dabil orain. Sinetsita dago komunitate bat inguruan izateak eredu iraunkor bat ekar dezakeela.
BERRIA / BERRIA

Urtzi Urkizu -

2016ko otsailak 21

El Mundo eta El País egunkarien edizio digitalen arduraduna izan zen, eta Soitu.es atari berritzailea sortu zuen 2007an Gumersindo Lafuentek (Madril, 1957). Pobreziaren aurkako PorCausa fundazioa zuzentzen du gaur egun.

Zein da kazetaritzaren etorkizunari buruzko eztabaida garrantzitsuena?

Zentzua duen kazetaritza herritarren zerbitzura dagoena da, botere ekonomikoak eta politikoak kontrolatzen dituena. Kazetaritza horrek independentzia behar du. Egun, komunikabideen independentzia ekonomikoa zaila da. Baina hobe da xumetasunean bizitzera ohitzea, kazetaritzaren balioei eutsiz.

Interes ekonomikoek dute lehentasuna kasu gehienetan.

Mezuak banalizatzeko joera dago, audientzia handiak lortzea baita helburua. Telebistaren bidea da hori, baina bide horrek ez du irtenbide onik.

Ba al dago aukerarik akziodun boteretsuen interesen menpe dauden komunikazio taldeek kazetaritza digitalak dituen erronkei aurre egiteko?

Komunikabide batzuek talde multimedia handi bihurtzeko anbizioa izan dute, eta, hori finantzatzeko, burtsan sartu dira. Akziodunen interesei gehiago begiratzen diete irakurleen interesei baino. Horrek independentzia kentzen die hedabideei. Kazetaritza erromantizismorik gabe gelditzen da.

Kioskoetan gero eta egunkari gutxiago saltzen dira. Gazteek ez dute paperean irakurtzen.

Kontsumitzaileek Internet erabiltzen dute informatzeko, eta euren filtroak jarri. Paperezko formatu tradizionalak bere glamour-a galdu du belaunaldi berrietan. Dena den, mezua garrantzitsuagoa da formatua baino. Egoera berrian funtsezkoena kazetaritzak irautea da. Egunkariek bizirik irautea, alor praktikotik, garrantzigabekoa iruditzen zait.

Propio tabletetarako sortutako komunikabide digitalek ez dute funtzionatu.

Ez, halakoek ez dute arrakasta lortu. Kazetaritza produktu nabarmenak sortu behar dira, eta horiek edozein gailutan kontsultatzeko argitaratu behar dira. Formatu batera mugatuz gero, irakurle potentziala ere mugatu egiten duzu. Teknologia erabili behar da produktu osoak egiteko, edozein gailutarako. Hartzaileak sentsazioa izan behar du produktuaz edozein tokitan disfruta dezakeela.

Interneten kontatzeko modu berriak erabiltzen dutenek fruituak jasoko dituzte gero?

Berritzaileek fruituak jasoko dituzte, baina agian ez berehala. Zenbait berritasunek ez dute berehala arrakasta lortzen, baina, gero, estandar bihurtzen dira denborarekin. Soitu.es atarian martxan jarri genituen zenbait saiakera Ameriketako Estatu Batuetan erabili dituzte. Berritasunean egon behar da, eta, batez ere, etengabe pentsatu behar da zein tresna diren egokiak egiten dena jendeari ulertarazteko.

Bat-batekotasunari ematen zaion garrantziaz zer diozu?

Esaten zen Internetek soilik azken orduko berriak emateko balio zuela, eta erreportajeetarako eta analisirako papera zegoela. Errealitateak erakutsi du hori ez dela horrela. Interneten azken ordua eman daiteke, baita 35 orrialdeko elkarrizketak ere. Baina bat-batekotasunak esperientzia eta heldutasuna eskatzen du. Horretan plus bat nahi bada, kazetari eskarmentudunak behar dira, gertatzen ari dena testuinguruan kokatzeko gai izango diren profesionalak. Filtro zehatzak ere behar dira, eta mezuak kontrolatu. Mantsoago baina seguruago izateak sinesgarritasuna sorrarazten du.

Komunitate txikietan hurbiltasun handiagoa lor dezakete hedabideek irakurleekin?

Komunikabide bati zentzua ematen diona eta eredu iraunkor bat eman diezaiokeena bere inguruan komunitate bat izatea da. Interes ezberdinen araberakoak izan daitezke komunitateak. Baina, nahiz eta txikia izan, truke emozionalean lan egiteak funtzionatzen du. Hizkuntzaren kasuan, euskara aukera izan daiteke, ez muga, jende multzo bat batu dezakeelako.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©JAIZKI FONTANEDA / FOKU

«Guztiok gatoz leku beretik: guztiok gara afrikarrak»

Unai Etxenausia

'Geu, afrikarrok' aurkeztu du Arrosagaraik, zenbait gazteren istorioak biltzen dituen erakusketa bat, Gasteizko Montehermoso kulturunean. Otsailaren 26ra arte egongo da ikusgai.
Madrilgo komentu batean

'Marten' hegaldia

Enekoitz Telleria Sarriegi

Francoren erregimenak, Eliza katolikoarekin batera eta Australiako Gobernuarekin tratua eginda, ehunka euskal emakumezko bidali zituen Australiara, 1960ko hamarkadan. Han lana eginaraztea eta aurretik hara bidalitako gizonezkoekin ezkonaraztea zen bidaia haien benetako helburua. 'Marta plana' deitu zioten, eta 'El avión de las novias' dokumentalean jaso dute.

«Misiolari gisa bidali nahi gaituzte»

«Misiolari gisa bidali nahi gaituzte»

Enekoitz Telleria Sarriegi

Natalia Ortiz ikerlariak, besteak beste, Josefina Erezuma bizkaitarraren istorioa jaso du bere ikerketan, Jaime Aberasturi senargaiarekin izan zuen eskutitz trukearen bidez.

 ©OIER ARANZABAL

«Audio plataforma bat sortuko dugu datozen hilabeteetan»

Urtzi Urkizu

Ikus-entzunezkoetarako Primeran iritsiko den moduan, irrati eta audioetarako beste plataforma bat sortuko dute, Goñik iragarri duenez. «Kolaborazioak sustatuko ditugu euskalgintzarekin».

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...