LARREPETIT

Katalunia txiki bat

Maddi Ane Txoperena Iribarren -

2017ko irailak 20
Ez da nik esana; azken egunotan behin eta berriro entzun diet Herrialde Katalanetako politikari eta herritarrei komunikabideen ahotan: Kataluniako independentistak areagotu egiten dira Espainiak ematen duen kolpe zakar bakoitzeko. Eta Espainiako estiloa, izan, bada zakarra. Beti izan da horrela.

Entzun dudan beste gauzetariko bat: lehenago ez al zen konturatu Espainia katalanak benetan ari zirela? Aitortu behar dut: ni ere ez nintzen erabat konturatua zenbateraino ari ziren serio, joan den asteazkenean Vilaweb kazetako Vicent Partali Andoaingo hitzaldian hainbesteko determinismoa eta ziurtasuna sumatu nion arte. Galdera ez zela erreferenduma egingo ote zuten, baizik eta nola egingo zuten espainiarrek hura galarazteko; botatako azalpen ederretako bat, adibidez. Beste hamaika deskribapen ere bai: nola daukaten aurretik guztia prestatuta (ez orain, baizik eta prozesuaren hasieretatik ia), liburu zurian fin idatzita... gertatuko dena hatz puntekin ukitzeraino, erabat harrapatu arte.

Azken asteotan argi daukat nik ere: baietz, egingo dutela, eta gainera lortuko dutela; agian, espero dut. Edo berehala lortzen ez badute behintzat, saiatu izanen dira, eta ziur beste zirrikituren bat aurkitzen dutela hor zehar, egindako aurrerapauso askok ez baitaukate atzera bueltarik.

Mediterraneo aldera inbidia puntu batez begiratzen dudala ezin uka. Nahiko nukeela haiek bezala egotea puntu batzuetan, nahiz errealitatea ezberdina izan. Ez da komeni idealizatzea, ordea, eta horretarako haiengandik gehiago ikastea, beste erremediorik ez. Horretarako aukera ederra izango da gaurtik igandera bitarte asCATasunera asterako Donostian prestatu dutena: janzteko hamaika hitzaldi, eta hango haizez zipriztintzeko beste hainbat ekitaldi kultural. Katalunia zati bat ekarri baitute Intxaurrondora; Euskal Herria bihurtzeko, ahal bada, Katalunia txiki bat.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna