LARREPETIT

Aske

Maddi Ane Txoperena Iribarren -

2018ko apirilak 11
Egunero egin ohi dudan ibilbidean hiru Patrol gurutzatu ditut gaur, berriz ere. Ez didate ikararik eman, ohituta nagoenez. Baina poztu egin naiz gurutzatu besterik ez ditudalako egin, eta ez zeudelako niri bidea oztopatzen, eguneroko ibilbideko biribilgune edo kurba ertz batean. Hala daudenean baina GAR-ren ordez Fiscal y Fronteras izendapena ikusten diedanean ere lasaitu egiten zait arnasa, kotxean deus berezi eta arriskutsurik eduki ez arren. Tentsioa baitakar Guardia Zibilak, beti. Ordezkatzen dituelako, niretzat eta beste askorentzat, tortura, atxiloketak eta okupazio militarra, besteak beste.

Lasaitasunez eta ohiko moduan gurutzatu ditut, ordea, errepidean, beste behin ere. Adur Ramirez de Aldak, Oihan Arnanzek eta Jokin Unamunok egunero funtzionarioak gurutzatuko dituzten gisan. Zer eta, besteak beste, salatzeagatik egunero gurutzatzen zituztela patrolak herrian, egunero egin ohi zuten ibilbidean.

Asteon ere izan dugu horiekin loturiko albisterik: Erronkariko hiru gazteri bi urte eta bi urte eta sei hilabeteko espetxe zigorrak ezarri dizkie Nafarroako Auzitegiak, Guardia Zibilak babestuta Pirinioetako herrian «protesta» bat egitera joan ziren eskuin muturreko faxisten aurka mobilizatzeagatik. Hispania Verde zuten izena paradoxikoki Espainiaren menpeko lurraldea polizia berdez josita ere nahi duten horiek.

Ez da matematikari fina izan beharrik kalkuluak egin eta egoeraren injustizia kalkulatzeko, eta ikusteko noren kontakizunak balio duen kasu bakoitzean, eta zeinena den hutsala. Horregatik aterako gara berriro kalera, bihar ikastetxe eta herrietan, eta larunbatean Iruñean, Altsasukoak aske nahi ditugula aldarrikatzeko. Baina auzi zehatzetik harago ere, aterako gara kalera, ozen adierazteko injustiziaren ordezkari diren horiek ez ditugula egunerokoan errepidean gurutzatu nahi; guk ere aske bizi nahi dugulako.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna