LARREPETIT

Turistak

Onintza Enbeita -

2018ko martxoak 30
Garai batean terrorismoaren ondorioz gelditzen ziren hotelak bete gabe; orain, klima txarra delako. Kontua da, opor egunak hurbiltzen direnero, telebista eta irratietan bisitatzera etorri zaizkigunak elkarrizketatzen dituztela. Agertzen dira batzuk eta besteak, eta esaten digute halako hiritan hotelak beteta daudela, edo gizon gorbatadun batek kontatzen digu nola aurten ez zaizkien gela guztiak bete. Turismoak gurean zein garrantzi duen erakusten du hedabide publikoetan ematen zaion garrantziak. Urteak dira, herritar arruntok konturatu ez baginen ere, azpiegitura garrantzitsuak abiatu zirela turismoak utziko digun diruaren aitzakian. Eta badirudi kalkulua egin zuenak asmatu ere egin zuela. Beste gauza bat da Guggenheimek eman diona eman diezaion, zer kendu zaion Bilbori. Eztabaida hori ez da interesgarria, antza: zenbakiak beste era batera zenbatzen dira hemen.

Eta inoiz pena hartzen dut gurera etorri direnen adierazpenak entzuten ditudanean. Ehuneko ehunari iruditzen zaio izugarri ondo jaten dela Euskal Herrian, ehuneko laurogeiak esaten du jende jatorra garela, ehuneko hirurogeia paisaiak kautibatzen du eta badirudi gure hiriburuen tamainak erakartzen duen bisitaririk ere badela. Eta esango nieke nik hemen badirela hizkuntza, kultura, kirola eta ikusten ez diren ez dakit zenbat gauza. Gustatuko litzaidake esatea ez garela Santimami├▒etik atera ziren gizaki haiek: garatu egin garela eta gauza interesgarri asko egiten direla hemen.

Baina ispiluak ez du ia inor engainatzen, eta neuk ere isilarazi egiten dut neure burua. Geuk ere horixe egiten baitugu beste nonbaitera goazenean: gauza topiko eta azalekoekin gelditu, derrigorrean ikusi beharreko lekuak ikustera joan... ez diot, beraz, inori harririk botako. Lau egun libre ditugun aldiro tour inposibleak egiteko joera harrigarri bezain ulertezin hori, askok baitugu oporren beharra eta oporretan urrutira joateko beharra nahasten hasi ginenetik.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna