LARREPETIT

Berez

Maddi Ane Txoperena Iribarren -

2018ko otsailak 21
Torturaren aurkako egunean eman zuen Giza Eskubideen Europako Auzitegiak Mattin Sarasola eta Igor Porturen torturen aurkako epaiaren berri. Eman zigun halako poz bat azkenean Espainia zigortzeak: ez dutelako bakarrik jo torturak ez ikertzeagatik; «tratu txarrak» eman izana ere leporatu diote estatuari oraingoan; funtsean, eta hala erran ez badu ere, torturatzeagatik. Hala, 50.000 euro ordaindu beharko dizkie Espainiak kalteengatik: 30.000 euro Porturi, eta 20.000 Sarasolari, berez.

Espero izatekoa zen bezala, ordea, segituan hasi zaizkigu berriro ere espainiarrak kexaka. Ez du, bada, Espainiako Auzitegi Nazionaleko fiskalak eskatu diru hori izan dadila ETAren biktimentzat?!

Hamar urte daramatzate jada Sarasolak eta Portuk espetxean, eta lagun batek, inuxente, galdegin zidan ea Europaren epaiak eraginik izan zezakeen bi euskal preso politikoen kondenetan. Ez nuen aurrez pentsatua, baina zentzua, berez, badu: torturapeko deklaraziotan oinarrituta jarri dizkiete ehunka urteko espetxe kondenak bi lesakarrei. Torturatu zituztela frogatu bada, beraz, deklarazio horiek ez lukete balio beharko, ezta? Berez. Eta, orduan, agian, etxean beharko lukete biek? Lagunari hala erran nion: hala beharko lukeela berez, nire ustetan. Baina…

Justiziaren eta zentzu onaren bidean mugituko bagina, kalean beharko lukete, halaber, Frantziako espetxeetan baldintzapeko askatasun eske diren Ion Parotek, Frederic Haranburuk eta Jakes Esnalek, erraterako. Edota larriki eri izanik espetxean dauzkatenek. Eta ez lukete sekula espetxera joan behar izanen torturapeko inkulpaziotan oinarrituriko gazte —eta ez hain gazte— guziek. Eta abar, eta abar... Berez.

Baina, egia erran, ez dakit xuxen zergatik harritzen garen hainbertze halakorik ez dela gertatzen ikusita. Espainiak berezkoak baititu gezurra, injustizia eta demokraziarik eza; zerbait erratearren.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna