LARREPETIT

Hitz egin

Iñigo Aranbarri -

2018ko maiatzak 13
Hunkitu egin ninduen gaur hamar egun Martxelo Otamendik Rosa Lluch irakasleari eginiko elkarrizketak. Argia iruditu zitzaidan, eta argitsua. Osagaiak, bazituen, aurrez aurre zeuden biek pasatutakotik hasita. Erantzunetan igartzen zen aldarteak edertu egiten zuen iraganeko itzal oro. Tartean, Ernest Lluchen hilketaren ostean Gemma Nierga kazetariaren hitzak dakartzate biek gogora, «hitz egin ezazue» esan zienean pankartan zeuden arduradun politikoei. Buruak nola lan egiten duen. Hitz egin. Pertsonaren ekintzarik ohikoena, eta beharbada, baita zailena ere unerik makurrenetan.

Hogei bat urte izango dira. Kotxean noa etxera, izotza ari du. Halako batean, argiak bidean. Guardia Zibilaren kontrola. Ohi bezala orduan, geratzeko, itzaltzeko motorra. Paperak, prakak jaitsarazi dizkidate, jartzeko ezpondari begira. Sasi artearen ederraz gozatzen ari naizela, irratiz hizketan entzuten ditut. Kotxean dabiltza aztarrika. Hurreratzeko. Linternak zelulosazko kaosa argitzen du. Ontzurrea aurkitu dute. Orri multzo bat da, eta IRA irakur diteke garbi askorik. Zer den hura. Literatura, diotsat. Brenan Behan delako baten hogeita bat testu labur. Hasteko erdaratzen. Jaka har dezaket? Ez. Dardarrez ekiten diot Behanek ingelesez idatzi, lagun batek euskarara ekarri eta nik harena gaztelerara itzultzeari. Mihia baino bost lerro aurretik doaz begiak. Tartean, alkoholez bustitako atentatu bat dator izan ere. Ezin diot «pistola» dioen tokian «ogia» esan. Noizkoa da, Michael Collinsen garaikoa? Liburu osoa itzularazten dit intelektualak. Kartzelan lagunik badudan jakin nahi du. Nola konpon daitekeen «hemengo arazoa». Rosa Lluchen hitzak errepikatzen dizkiot, ETAk aita hil baino hiru urte lehenago. Tipo interesgarria zara, diost lau orduren buruan. Ea hau amaitzen denean geratzen garen zerbait hartu eta hizketan segitzeko.

Beldurrak airean nago telefonoak jotzen duen bakoitzean.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna