LARREPETIT

Eraso eta barre

Onintza Enbeita -

2018ko ekainak 8
Aurpegi polita daukala. Horixe da nazioarteko komunikabideek Pedro Sanchezi buruz gehien azpimarratu dutena. Bertorago ere, askok erabiltzen dute haren edertasuna hari barre egiteko. Eta jende asko konturatu da ez dela gauza erosoa. Izan ere, oso desatsegina da, norberak lan politikoa egin nahi duenean, beste guztiek lan horregatik ez beste edozergatik epai dezaten norbera. Oso ondo ulertzen dudan sentsazioa da, eta ez naiz bere gorputza eztabaida politikoaren erdian sentitu duen pertsona bakarra. Sanchezena, gutxienez, gorputz edertzat erakusten digute. Nik ez dut zorte hori izan; eta beste askok ere ez. Jakina, bururatzen zaizkidan gehienak emakumeak gara.

Horregatik poztu naiz Sanchez haginean printza disdiratsu batekin ikusi dudanean. Eta poztu egin naiz zenbait kazetari eta politikari horregatik haserre ikusi ditudanean ere. Hor daukazue, pentsatu dut, zeuen botika zeuentzat. Halako barne bake bat eman dit batek baino gehiagok momentu honetan izan behar duten bihotzerrea kalkulatzeak. Guri ez baitigute ezer erraztu. Behinolako ministroaren ezpainak, politikari gaztearen ile orrazkera, nekaneak, hirurogeita bederatzira bultzatzen duten izterrak, gorputz lodi nazkagarriak, bortxatzen ez bagaituzte abortatu beharrik izango ez omen dugun neskak, bakanen baten aluko usainaz ere aritu izan dira. Bai, aritu izan zarete. Begiratu bestela hemerotekak.

Aldatu den bakarra da orain ingelesez ari direla gobernu bateko gizon presidenteari adjektiboak jartzen, eta haren edertasuna dela eztabaida politikoa desitxuratu eta ordezkatzen dutena. Horretan ere, beti galtzaile gu. Nola gizonen gustukoak izatea den munduan egitea tokatu zaiguna, pentsatzen dute gure itsustasuna azpimarratzeak hondoratu egingo gaituela. Gizonen kasuan, edertasunetik egiten da ironia (edo). Baina ironia bakarrik, eta ez guri eraso egiteko erabiltzen duten umore zikin eta narrasa. Umorea deitzerik badago, jakina.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna